დუშეთის, ყაზბეგისა და თიანეთის გაერთიანებული ოლქის მაჟორიტარმა დეპუტატმა ზაქარია ქუცნაშვილმა დუშეთის მუნიციპალიტეტის მერთან ზურაბ სეხნიაშვილთან ერთად მჭადიჯვრის ადმინისტრაციულ ერთეულში დასრულებული სასმელი წყლის პროექტები დაათვალიერა და სოფელ კადოეთისა და ლამოვანის მოსახლეობას გაესაუბრა.
როგორც „ინტერპრესნიუსს“ დუშეთის მუნიციპალიტეტიდან აცნობეს, აღნიშნულ სოფლებში წლების განმავლობაში არსებობდა სასმელი წყლის პრობლემა, რაც წყლის სისტემის რეაბილიტაციის შედეგად გადაიჭრა. სანიტარული დაცვის ღობეებით ადგილზე მოეწყო ორი ჭაბურღილი და ორი წყალშემკრები რეზერვუარი, რომელთა დაერთებაც მოხდება არსებულ ქსელზე.
სამუშაოები რეგიონში განსახორციელებელი პროექტების ფონდისა და დუშეთის მუნიციპალიტეტის თანადაფინანსებით განხორციელდა, ხოლო შემსრულებელ კომპანიებს შპს „უნივერსალი“ და შპს „დაკო“ წარმოადგენენ.