თორნიკე რიჟვაძემ საერთაშორისო კონგრესის მონაწილეებს სიტყვით მიმართა
ღონისძიება „ქალთა ჯანმრთელობა ჯანსაღ სამყაროში“ - ბათუმი საქართველოს სტომატოლოგთა ასოციაციის მე-15 საერთაშორისო კონგრესს მასპინძლობს. ღონისძიება, საპატიო სტუმრის რანგში, საქართველოს პრეზიდენტმა გახსნა. სალომე ზურაბიშვილმა ქალების როლზე ისაუბრა და აღნიშნა, რომ დღეს მსოფლიოში ქალი ლიდერები უფრო და უფრო ძლიერები არიან. ამის შესახებ „ინტერპრესნიუსს“ აჭარის მთავრობიდან აცნობეს.
დელეგატებს აჭარის მთავრობის თავმჯდომარე მიესალმა. თორნიკე რიჟვაძემ ხაზი გაუსვა რეგიონში სამედიცინო ტურიზმის კიდევ უფრო განვითარების მნიშვნელობას.
,,ჩვენს რეგიონში, ჩვენს ქალაქში ტრადიციად იქცა ამ მასშტაბის ღონისძიებების ჩატარება. განსაკუთრებით გვახარებს, რომ ეს კონგრესი ქალებსა და მათი ინტეგრაციის საკითხებს ეხება. დარწმუნებული ვარ, ეს ფორუმი ახალ პერსპექტივებს დასახავს, ხოლო მსგავსი ღონისძიებები ბათუმში კორპორატიული ტურიზმის განვითარებას კიდევ უფრო მეტად შეუწყობს ხელს“, - განაცხადა სიტყვით გამოსვლისას თორნიკე რიჟვაძემ.
მათივე ინფორმაციით, დღევანდელი ფორუმის ორგანიზატორები არიან საქართველოს სტომატოლოგთა ასოციაცია და სტომატოლოგთა მსოფლიო ფედერაციის ქალთა საერთაშორისო ორგანიზაცია. კონგრესის ფარგლებში, აჭარას მსოფლიოს სხვადასხვა ქვეყნიდან სტომატოლოგიური ასოციაციის პრეზიდენტები სტუმრობენ. ღონისძიება 2 დღეს გაგრძელდება.
v-if="article.gallery" v-html="article.gallery"
