მოშიმშლილე აქტივისტი ხათუნა ბერიძე ფოთის ჰოსპიტალიდან გაწერეს და ის შეკვეთილში, ბიძინა ივანიშვილის სახლის მიმდებარე ტერიტორიაზე მიმდინარე შიმშილობის აქციას შეუერთდა. როგორც ხათუნა ბერიძე ამბობს, მედიკოსებმა მას შიმშილობის შეწყვეტა ურჩიეს.

„კლინიკაში გამოკვლევები ჩამიტარდა. ექიმებმა შიმშილობის შეწყვეტა მირჩიეს, მაგრამ მე ისევ აქ ვარ, დავბრუნდი ჩემს მეგობრებთან. თუ კიდევ ცუდად გავხდი, ამ აქციაში მონაწილეობას ვერ გავაგრძელებ,“-განუცხადა ,,ინტერპრესნიუსს“ ხათუნა ბერიძემ.

შეგახსენებთ, რომ ხათუნა ბერიძე შეუძლოდ დღეს დილით გახდა, რის გამოც სასწრაფო დახმარების ბრიგადამ ის კლინიკაში გადაიყვანა, სადაც შესაბამისი კვლევები ჩაუტარდა.

შეკვეთილში სამი პირი შინაგან საქმეთა მინისტრის, გიორგი გახარიას გადადგომის მოთხოვნით მე-11 დღეა შიმშილობს. მათ ბიძინა ივანიშვილის სახლის მიმდებარე ტერიტორიაზე კარვები აქვთ გაშლილი.