ზესტაფონის მერმა გიორგი გოგლიჩიძემ და საკრებულოს თავმჯდომარემ ვახტანგ ღამბაშიძემ ზინა ხიდაშელს 100 წლის იუბილე მიულოცეს. ამის შესახებ „ინტერპრესნიუსს“ ზესტაფონის მერიიდან აცნობეს.

მათივე ინფორმაციით, იუბილესთან დაკავშირებით, ზესტაფონის მერიის სახელით უხუცეს ქალბატონს პირად ანგარიშზე 300 ლარი დაერიცხება.

„ზინა ხიდაშელი სოფელ პირველ სვირში ცხოვრობს. ჰყავს 3 შვილი, 4 შვილიშვილი და 7 შვილთაშვილი. ქალბატონი ზინა, პირველის სვირის საბავშვო ბაღში 45 წელი ეწეოდა პედაგოგიურ საქმიანობას. 5 ივლისს მას 100 წელი შეუსრულდა. მილოცვები მიიღო და სტუმრებსაც თავად გაუმასპინძლდა“, - ნათქვამია ზესტაფონის მერიის მიერ გავრცელებულ ინფორმაციაში.

„ქალბატონმა ზინამ გულთბილად მიგვიღო და გვიმასპინძლა. სასიამოვნოა, რომ ჩვენ დღეს მას 100 წლის იუბილე მივულოცეთ. მან მუნიციპალიტეტის ამბებიც მოიკითხა და საკუთარი სურვილებიც გაგვანდო. ჩვენ შევეცადეთ გაგველამაზებინა ეს დღე მისთვის და ადგილობრივი თვითმმართველობის სახელით მცირედი საჩუქარი გაგვეკეთებინა“, - განაცხადა ზესტაფონის მერმა გიორგი გოგლიჩიძემ.