ის კადრები, რაც სოციალურ ქსელში გავრცელდა, თითქოს ჩვენთან საკვები მოაქვთ, ჩვენს კარავში არ არის გადაღებული, - ამის შესახებ განცხადება შეკვეთილში მიმდინარე აქციაზე მოშიმშილეებმა გააკეთეს. მათი თქმით, სხვადასხვა ლოკაციაზე ოთხი კარავია გაშლილი, მოშიმშილეები კი მხოლოდ ერთ კარავში იმყოფებიან, რომელიც ბიძინა ივანიშვილის სახლის ცენტრალურ შესასვლელთან არის გაშლილი.

„კადრები, რომელიც სოციალურ ქსელში გავრცელდა, არის დენდროლოგიურ პარკთან განთავსებული კამერით გადაღებული და ადამიანები, რომლებიც ამ კადრებში ჩანან, მოშიმშილეები არ არიან“, - განაცხადა მოშიმშილე მინდია ადაძემ.

მოშიმშილეების განცხადებით, მიუხედავად იმისა, რომ მათ ამ დღეების განმავლობაში ჯანმრთელობასთან დაკავშირებით პრობლემები არაერთხელ შეექმნათ, შიმშილობის შეწყვეტას არ აპირებენ.

ამ წუთებში შეკვეთილში გიორგი გახარიას გადადგომის მოთხოვნით აქცია მიმდინარეობს.