დავით მათიკაშვილი - ბოლო რამდენიმე წლის მანძილზე პირველად მოხდა, რომ საარჩევნო ცვლილებებთან დაკავშირებით ქართულ პოლიტიკურ აზროვნებაში კონსენსუსია

ბოლო რამდენიმე წლის მანძილზე პირველად მოხდა ისე, რომ ფაქტიურად, ქართულ პოლიტიკურ აზროვნებაში ერთგვარი კონსენსუსია მიღწეული მაშინ, როდესაც მმართველმა გუნდმა საკუთარი ნებით უარი თქვა თავის სასტარტო უპირატესობაზე და უკვე 2020 წელს ერთიანი პროპორციული სისტემით არჩევნების ჩატარების გადაწყვეტილება მიიღო, - ამის შესახებ პარლამენტის იურიდიულ საკითხთა კომიტეტის თავმჯდომარის მოადგილე დავით მათიკაშვილმა 8-10 ივლისს, საარჩევნო კანონმდებლობის რეფორმირების საკითხებზე შექმნილი სამუშაო ჯგუფის შეხვედრასთან დაკავშირებით განაცხადა.

დავით მათიკაშვილის თქმით, ამ ფორმატში შეხვედრები ძალიან მნიშვნელოვანია და მაქსიმუმი გაკეთდება საქართველოში საარჩევნო კანონმდებლობის გასაუმჯობესებლად.

„ეს არის კონსტიტუციაში ცვლილების შეტანის პროცესი და ის შესაბამისი კომისიის ფუნქციონირებით იწყება. მოსაზრებებისთვის კარი ღიაა, თუმცა მმართველი გუნდის შეთავაზების ამოსავალი წერტილი და პრინციპი ერთიანი პროპორციული სისტემა და ნულოვანი ბარიერია. ამ თემაზე აქტიური დისკუსია გვექნება პოლიტიკოსებთან , საზოგადოებასთან და იმ ადამიანებთან, ვინც უნდა გამოიყენოს კანონმდებლობა, რომელსაც ჩვენ შევქმნით. ჩვენი მიზანია, ეუთო-ს რეკომენდაციების მიხედვით რეგულაციების სათანადოდ დამუშავება. თუკი არსებობს შესაძლებლობა, რომ კიდევ უფრო მეტად გაუმჯობესდეს საარჩევნო კანონმდებლობა”, - განაცხადა დავით მათიკაშვილმა.

რაც შეეხება იმას, დაესწრება თუ არა სამუშაო შეხვედრას „ნაციონალური მოძრაობა და „ევროპული საქართველო“ მათიკაშვილის თქმით, სამუშაო ჯგუფის ფარგლებში პოლიტიკური ისტებლიშმენტის მთელი სპექტრია მიწვეული, მაგრამ ვისაც სურვილი გააჩნია, ის იქნება წარმოდგენილი.

„ოპოზიცია ყოველთვის ცდილობს გარკვეული სპეკულაციებით ელფერი დაუკარგოს ძალიან მნიშვნელოვან გადაწყვეტილებას, რომელიც ჩვენს საერთაშორისო პარტნიორებთან ერთად საარჩევნო კანონმდებლობაში ცვლილებების შეტანას და ამ თემაზე მსჯელობას გულისხმობს“, - აცხადებს მათიკაშვილი.

მისივე თქმით, სამუშაო ჯგუფის შეხვედრაზე პარლამენტის წევრებთან ერთად, მიწვეულები არიან ქართული პოლიტიკური სპექტრის ყველა წარმომადგენელი და საერთაშორისო პარტნიორები.

მარკო მიკელსონი - საქართველომ ყურადღების მოსაპოვებლად უნდა იბრძოლოს - პატარა ქვეყნები იმაზე დიდები უნდა ვიყოთ, ვიდრე ფიზიკურად ვართ
ქართული პრესის მიმოხილვა 25.02.2020
ირაკლი მელაშვილი - ვფიქრობ, საარჩევნო სისტემასთან დაკავშირებით არსებულ  ფონზე ხელისუფლებას გაუჭირდება ოპოზიციისთვის მოლაპარაკებების ჩაშლის გადაბრალება
როგორ დავაჩქაროთ მდგრადი განვითარების მიზნების განხორციელება აზიასა და წყნარ ოკეანეთში