პარტია „თავისუფალი საქართველო" ქუთაისში გაუმართავ საგზაო ინფრასტრუქტურას აპროტესტებს. პარტიის იმერეთის ორგანიზაციის თავმჯდომარის, გოგი წულაიას განცხადებით, პუშკინის ქუჩაზე, სადაც ტურისტების 90% მოძრაობს, გზა გადათხრილია.
წულაიას თქმით, მას შემდეგ, რაც ბრიფინგი დაანონსა, მერიამ მუშები გაუშვა და სამუშაოები წვიმაში დაიწყო.
„მადლობა სუს-ს, რომ მისმენენ და ამით მაინც იგებენ, რა პრობლემებია ქალაქში. ქალაქის მერი სულ მივლინებებშია და გიორგი ჭიღვარიას ამერიკაში და ინგლისში არავინ უთხრა, რომ გზებია დაზიანებული. ჩვენ რაც ბრიფინგი დავაანონსეთ, სასწრაფოდ, წვიმაში გამოიყვანეს მუშები და დაიწყო ქვაფენილის დაგება, კარგია ასე თუ მაინც აკეთებენ", - განაცხადა გოგი წულაიამ.
მან სიმბოლურად გზის დაგებაში თავად მიიღო მონაწილება.
ადგილზე იმყოფებოდა მერიის კეთილმოწყობის სამსახურის უფროსი ბექა ყურაშვილი. მისი თქმით, არ იცოდა გოგი წულაიას ბრიფინგის შესახებ და სამუშაოები დაგეგმილი იყო. კითხვაზე, რატომ გახდა წვიმაში გზის დაგება აუცილებელი, პასუხობს, რომ ეს გეგმური სამუშაოა და წვიმა პრობლემას არ ქმნის.