ფოთში, საქალაქთაშორისო რეისებზე მომუშავე მიკროავტობუსების მძღოლები გაიფიცნენ

ფოთში, საქალაქთაშორისო რეისებზე მომუშავე მიკროავტობუსების მძღოლები გაიფიცნენ. მათი თქმით, ადგილობრივი ხელისუფლება მათ ავტოსადგურის რეაბილიტაციას სთხოვს, მათ კი აღნიშნული ფართი იჯარით აქვთ აღებული და თანხას ტერიტორიის მეპატრონეს უხდიან.

შეკრებილები აცხადებენ, რომ ავტოსადგურის შენობა და ტერიტორია მეპატრონემ უნდა მოაწესრიგოს.

„ჩვენთან მერიის ზედამხედველობის სამსახურიდან მოვიდნენ, გვითხრეს გაარემონტეთ ეს შენობა, წინააღმდეგ შემთხვევაში დაგაჯარიმებთო. თუ არ შეასრულებთ მოთხოვნას, ისეთ მდგომარეობაში აღმოჩნდებით, რომ ბოლოს ქუჩაში დარჩებითო. ეს ტერიტორია ჩვენი არ არის, ერთწლიანი ვადით დავიქირავეთ. თუ ჩვენი ხარჯებით გავარემონტებთ, სად არის იმის გარანტია, რომ აქედან არ გაგვიშებენ. ამ საკითხზე გვქონდა შეხვედრა ქალაქის მერთან, ის დახმარებას დაგვპირდა. პირველ რიცხვამდე უნდა გადმოეცათ ჩვენთვის ალტერნატიული ფართი, რაც არ მოხდა,“- განუცხადა ჟურნალისტებს ავტოსადგურის დირექტორმა დათო შონიამ.

ფოთის მერიაში აცხადებენ, რომ მეპატრონესა და მოიჯარეს შორის ხელშეკრულების თანახმად, ავტოსადგურის მოწესრიგება სწორედ დამქირავებელს ეკისრება.

„დამქირავებელს ხელშეკრულებით აქვს ვალდებულება ავტოსადგურის მოვლა-პატრონობაზე. ხედავთ, რომ ობიექტს მოვლა-პატრონობის არაფერი ეტყობა. ჯარიმა გამოიწერა შენობის იერსახის გამოსწორებაზე და ტერიტორიის მოუვლელობაზე. ეს არის მინიმალური ჯარიმა 250 ლარი. სასამართლომ ისინი არ დააჯარიმა, მაგრამ გაფრთხილება მისცა, რომ ეს სიტუაცია უნდა გამოასწორონ“, - განაცხადა არქიტექტურის სივრცითი მოწყობისა და ადმინისტრაციული ზედამხედველობის სამსახურის უფროსის მოვალეობის შემსრულებელმა, თენგიზ შონიამ.

სამარშუტო ტაქსების მძღოლები ალტერნატიულ ფართს ითხოვენ.