შეკვეთილში, ბიძინა ივანიშვილის სახლის მიმდებარე ტერიტორიაზე 2 მოშიმშილე აქტივისტი შეუძლოდ გახდა. მინდია ადაძე და მარად შავაძე სასწრაფო სამედიცინო დახმარების ჯგუფმა ფოთის ჰოსპიტალში გადაიყვანა. ექიმების ინფორმაციით, მათ სათანადო სამედიცინო კვლევები უტარდება. მედიკოსები მათ შიმშილობის შეწყვეტას ურჩევენ.
„მათი მდგომარეობა დამაკმაყოფილებელია, თუმცა იქიდან გამომდინარე, რომ ამდენი დღეა შიმშილობენ, აქვთ ზოგადი სისუსტე. პირველადი დახმარება ჩვენ ადგილზე გავუწიეთ, მაგრამ დანარჩენი სტაბილიზაციისთვის გადმოვიყვანეთ კლინიკაში. თერმოდინამიკა ნორმაში აქვთ,“- განუცხადა „ინტერპრესნიუსს“ ფოთის სასწრაფო-სამედიცინო დახმარების მორიგე ექიმმა ნანა რირუამ.
შეგახსენებთ, რომ შეკვეთილში, ბიძინა ივანიშვილის სახლის მიმდებარე ტერიტორიაზე რამდენიმე ადამიანი მე-19 დღეა შიმშილობს. ისინი შს მინისტრის გიორგი გახარიას თანამდებობიდან გადადგომას ითხოვენ.