მარნეულის მუნიციპალიტეტის სოფელ კირაჩმუღანლოში სტიქიის შედეგების სალიკვიდაციო სამუშაოები მიმდინარეობს

მარნეულის მუნიციპალიტეტის სოფელ კირაჩმუღანლოში სტიქიის შედეგების სალიკვიდაციო სამუშაოები მიმდინარეობს. ადგილზე იმყოფება მარნეულის მერი ზაურ დარგალი.

როგორც ,,ინტერპრესნიუსს" მარნეულის მუნიციპალიტეტის მერმა ზაურ დარგალმა განუცხადა, ძლიერმა წვიმამ სოფლის გზაზე ნიაღვარი წარმოქმნა და სახლები დატბორა. დატბორილი სახლებიდან წვიმის წყალი უკვე ამოიტუმბა, ასევე მიმდინარეობს ეზოებისა და გზების გაწმენდა.

,,ძლიერი წვიმა წუხელ გვიან ღამით დაიწყო. ყველა შესაბამისი სამსახური ადგილზე იყო და ტარდებოდა სტიქიის დროს გათვალისწინებული ღონისძიებები. ამ დროისათვის სოფელში ტექნიკა მუშაობს. მარნეულის სოფლები 4 დღის წინ ასევე დააზარალა სტიქიამ, დაისეტყვა საკარმიდამო ნაკვეთები, მოსავალი განადგურდა, დაზიანდა საცხოვრებელი სახლების სახურავები. სტიქიისგან მიყენებულ ზარალს სპეციალური კომისია ითვლის", - განაცხადა ზაურ დარგალმა.