ბათუმის საკრებულოს სხდომაზე ხმაურია. დაპირისპირება ე.წ რივიერას ტერიტორიაზე ექვსი ცათამბჯენის მშენებლობის საკითხს მოჰყვა.
საზოგადოება "ბათომის" წარმომადგენლებმა ბათუმის საკრებულოს განცხადებით მიმართეს, რომ ცათამბჯენების მშენებლობა სანაპიროზე ეწინააღმდეგება კულტურული მემკვიდრეობის შესახებ საქართველოს კანონს.
საზოგადოება "ბათომის" შეფასებით, ტერიტორია უნდა შედიოდეს ისტორიული დაცვის სპეციალურ ზონაში და ამ ზონაში აღნიშნული მშენებლობა დაუშვებელია.
თავის მხრივ, "ქართული ოცნების" წევრებმა განაცხადეს, რომ აღნიშნული ეკონომიკურად მომგებიანი პროექტია და მოქალაქეები დასაქმდებიან. მათივე თქმით, ერთ მილიარდიანი ინვესტიცია განხორციელდება.
აღნიშნულს რეპლიკებით კვლავ საზოგადოება "ბათომის" წევრები გამოეხმაურნენ, რის შემდეგაც საკრებულოს თავმჯდომარემ შესვენება გამოაცხადა და უმრავლესობის წევრებმა სხდომათა დარბაზი დატოვეს.
შესაბამისად, საკითხზე კენჭისყრა ჯერ არ მომხდარა.