58 წლის მამაკაცი, რომელიც გორში, Fashion Week-ის საორგანიზაციო საკითხების უზრუნველყოფისას მძიმედ დაშავდა, ცოტა ხნის წინ გარდაიცვალა. კლინიკა ,,გორმედის“ სტაციონარში პაციენტს ორი დღის განმავლობაში ინტენსიურ რეჟიმში უტარდებოდა რეანიმაციული ღონისძიებები. ექიმები აცხადებდნენ, რომ მისი მდგომარეობა უკიდურესად მძიმე იყო.

,,კლინიკაში შემოყვანისას პაციენტის მდგომარეობა იყო უკიდურესად მძიმე, სიცოცხლისთვის შეუთავსებელი. პაციენტი ორი დღის განმავლობაში მოთავსებული იყო რეანიმაციულ განყოფილებაში და ინტენსიურ რეჟიმში უტარდებოდა რეანიმაციული ღონისძიებები, თუმცა, დაზიანების ხარისხიდან გამომდინარე, მისი ჯანმრთელობის მდგომარეობა არ გაუმჯობესებულა, ცოტა ხნის წინ კი, გარდაიცვალა“, - განაცხადა რეანიმაციული დეპარტამენტის მორიგე ექიმმა მარინა მარიამიძემ.

მოდების ჩვენების ორგანიზებისას, გორის მუნიციპალიტეტის მერიის კეთილმოწყობის სააგენტოს თანამშრომელი იმ სატვირთოს ძარიდან გადმოვარდა, რომლითაც Fashion Week-ის ბანერი გადაჰქონდათ. დაცემისას მან ქალა-ტვინის მძიმე ტრავმა მიიღო.