ჩემი შეფასება არის მხოლოდ ერთი, ეს არის ჩვეულებრივი პოლიტიკური დაპატიმრება და პოლიტიკური რეპრესიები, - ასე გამოეხმაურა „ერთიანი ნაციონალური მოძრაობის“ წევრი ხატია დეკანოიძე თავდაცვის ყოფილი მინისტრის, ირაკლი ოქრუაშვილისთვის და აქციაზე დაკავებულ პირებისთვის აღკვეთის ღონისძიების სახით პატიმრობის შეფარდებას.
„ნიშანდობლივია ის, რომ ოქრუაშვილმა ძალიან მნიშვნელოვანი განცხადებები გააკეთა, ეს ეხებოდა პირველ რიგში “რუსთავი 2”-ის საქმეს.
ოქრუაშვილმა ასევე განაცხადა, რომ პრაქტიკულად ჩვენებები და საქმეები იკერებოდა, საქართველოს პროკურატურაში, რაც არის რეალურად იმისი დასტური, როგორ არის პროკურატურა ივანიშვილის ხელში.
რაც შეეხება ოქრუაშვილისთვის და კიდევ ორი პირისთვის პატიმრობის მისჯას, ეს არის აბსურდი იმიტომ, რომ ყველა ის კადრი, რომელიც გამოქვეყნებული იყო, არც ერთ სამართლებრივ განზომილებაში არ ჯდება. პირდაპირ გამოცხადებული პოლიტიკური რეპრესიების ქრონიკაა, რაც ჩვენ ივანიშვილმა გამოგვიცხადა“, - განაცხადა დეკანოიძემ.