ირანი აცხადებს, რომ სპარსეთის ყურეში „ევროპული საბრძოლო ფლოტის“ არსებობა რეგიონში დაძაბულობას გაზრდის, - ამის შესახებ ინფორმაციას „ევრონიუსი“ ავრცელებს.

მათი ინფორმაციით, გაფრთხილება თეირანმა ირანის პრეზიდენტ ჰასან როჰანსა და ომანის საგარეო საქმეთა მინისტრ იუზუფ ბინ ალვაის შეხვედრის შემდეგ გააჟღერა.

„მათ (ბრიტანეთსა და აშშ-ს) სურთ, სპარსეთის ყურეში „ევროპული საბრძოლო ფლოტის“ შემოყვანა. ჩვენ მივიჩნევთ, რომ აღნიშნული ქმედებები არსებულ სიტუაციაში პროვოკაციულია. ეს მტრული მესიჯია, რომელიც დაძაბულობას გააღვივებს“, - განაცხადა ირანის მთავრობის პრეს-სპიკერმა ალი რაბიაიმ.

შეგახსენებთ, რომ ვითარება ირანსა და დასავლეთს შორის მიმდინარე თვის დასაწყისში მას შემდეგ დაიძაბა, რაც ირანის რევოლუციურმა გვარდიამ სპარსეთის ყურეში ბრიტანეთის დროშის ქვეშ მცურავი ტანკერი „საზღვაო წესების დარღვევისთვის“ დააკავა. ბრიტანეთმა გააჟღერა ინიციატივა, რომელიც სპარსეთის ყურეში ხომალდების უსაფრთხოების უზრუნველსაყოფად ევროპის საზღვაო მისიის შექმნას ითვალისწინებს. ბრიტანეთის გეგმას მხარდაჭერა გამოუცხადეს საფრანგეთმა, იტალიამ და დანიამ.

იხილეთ ვიდეო: ირანი: სპარსეთის ყურეში ევროპული საბრძოლო ფლოტის განთავსების გეგმა მტრული მესიჯია, რაც დაძაბულობას გააღვივებს