შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებმა, სასაზღვრო პოლიციის სამი ვერტმფრენის დამხარებით ტყის ხანძრის ლოკალიზება შეძლეს.

უწყების ინფორმაციით, ამ დროისთვის შიდა ქართლში, გორის მუნიციპალიტეტში, სოფელ საყავრესთან ტყის მასივში გაჩენილი ხანძრის სალიკვიდაციო სამუშაოები მიმდინარეობს.

ამ მომენტისათვის ადგილზე ღია ცეცხლის კერა აღარ არის. მიმდინარეობს ცალკეული მონაკვეთების დამუშავება, როგორც ცოცხალი ძალის, ასევე ვერტმფრენების საშუალებით. სიტუაცია კონტროლს ექვემდებარება.

"ხანძარი ლოკალიზებულია. ვერტმფრენებისა და ჩვენი მეხანძრე-მაშველების მიერ მიმდინარეობს ცალკეული კერების დამუშავება. ადგილზე ამ ეტაპზე რჩება ყველა მობილიზებული ძალა, რათა თავიდან ავირიდოთ მომდევნო გავრცელება. ადგილზე 13 ერთეული სახანძრო ავტოტექნიკა, 250-მდე მეხანძრე- მაშველი და 3 ვერტმფრენი რჩება. გავრცელების საშიშროება არ გვაქვს," - განუცხადა "ინტერპრესნიუსს" საგანგებო სიტუაციების მართვის სამსახურის კოორდინაციის სამმართველოს უფროსმა გიორგი გერგაულმა.

მთელი ღამის განმავლობაში ადგილზე უწყვეტ რეჟიმში მუშაობდა თბილისის, შიდა ქართლის, იმერეთის, სამცხე-ჯავახეთის, ქვემო ქართლის და მცხეთა-მთიანეთის სახანძრო-სამაშველო ჯგუფები. პროცესში ჩართული იყო სახანძრო სამაშველო და დამხმარე ტექნიკა. გათენებისთანავე განაახლა მუშაობა შინაგან საქმეთა სამინისტროს სასაზღვრო პოლიციის სამმა ვერტმფრენმა.