გორის მუნიციპალიტეტში, სოფელ საყავრესთან ტყის მასივში გაჩენილი ხანძარი ლიკვიდირებულია. ამის შესახებ საგანგებო სიტუაციების მართვის სამსახურში განაცხადეს. საგანგებო სიტუაციების მართვის სამსახურის უფროსის მოადგილის ლევან ღირსიაშვილის თქმით, პრევენციის მიზნით ადგილზე მეხანძრე-მაშველების ჯგუფები რჩებიან.

"სოფელ საყვარეში ხანძარი ამ ეტაპისთვი ლიკვიდირებულია. განახევრებულია მეხანძრე-მაშველების პირადი შემადგენლობა. რომლებიც ინტენსიურ რეჟიმში ახორციელებდნენ ქრობით სამუშაოებს. მონიტორინგის მიზნით ადგილზე ვტოვებთ ჯგუფებს, რომლებიც უწყვეტ რეჟიმში განახორციელებენ ტერიტორიის დათვალიერებას და საჭიროების შემთხვევაში მიღებული იქნება ზომები", - განაცხადა ლევან ღირსიაშვილმა.

შეგახსენებთ, რომ სოფელ საყავრეს მიმდებარედ ხანძარი 22 აგვისტოს გაჩნდა. ცეცხლი ტყის ქვედა საფარზე და ეკალ-ბარდზე იყო გავრცელებული. ხანძრის ქრობის სამუშაოებში სასაზღვრო პოლიციის ვერტმფრენები იყო ჩართული.