პარლამენტის რეგიონული პოლიტიკისა და თვითმმართველობის კომიტეტის თავმჯდომარე ზაზა გაბუნია და პარლამენტის წევრი ლევან კობიაშვილი, დეპუტატ მირიან წიკლაურთან, რეგიონული განვითარების მინისტრის მოადგილე ილია ბეგიაშვილთან, ჯანდაცვის მინისტრის მოადგილე გიორგი წოწკოლაურთან, სახელმწიფო რწმუნებულ მცხეთა-მთიანეთის მხარეში შალვა კერესელიძესთან და ყაზბეგის მერ ალექსანდრე ზაგაშვილთან ერთად, მუნიციპალიტეტში შემავალი სოფლების მოსახლეობას შეხვდნენ.

„სოფელ ყანობში 7 წლის წინ სკოლა იხურებოდა, რადგან ბავშვები სოფელში აღარ იყვნენ, დღეს კი არათუ სკოლა მუშაობს სრული დატვირთვით, არამედ ახალი საბავშვო ბაღიც აშენდა, რადგან შობადობის დონე და პატარების რაოდენობა გაიზარდა“,- აღნიშნა გაბუნიამ.

პარლამენტის პრესსამსახურის ცნობით, კომიტეტის თავმჯდომარემ ასევე აღნიშნა, რომ ყანობი ცენტრალურ ტრასას ახალი კაპიტალური ხიდით და გზით დაუკავშირდა.

შეხვედრები ასევე გაიმართა სოფლებში გორისციხეში, ხელშესა და ტყალშეთში.