საინტერესოა პრეზიდენტის პოზიცია, რატომ მოხდა დისკრეციული უფლებამოსილების ამ ფორმით გამოყენება, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა, პრეზიდენტის მიერ პოლიციელის მკვლელობაში მსჯავრდებული პირის შეწყალებაზე საუბრისას განაცხადა.

"ამ კონკრეტულ საკითხზე, როგორიცაა პოლიციელის მკვლელის შეწყალება, რომელსაც ნახევარი სასჯელიც არ აქვს მოხდილი, არ არის მისაღები, თუმცა საინტერესოა პოზიცია, რატომ მოხდა ამ დისკრეციული უფლებამოსილების ამ ფორმით გამოყენება",- აღნიშნა ოხანაშვილმა.

შეგახსენებთ, პრეზიდენტმა სალომე ზურაბიშვილმა მარიამობის ბრწყინვალე დღესასწაულთან დაკავშირებით 34 მსჯავრდებული შეიწყალა, საიდანაც 1 არასრულწლოვანი და 8 ქალია.

შეწყალებულთა შორისაა პოლიციელის მკვლელობაში მსჯავრდებული რამაზ დევაძე, რომელიც ბათუმელი პოლიციელის, თარაშ მუკბანიანის მკვლელობისთვის იხდიდა სასჯელს. რამაზ დევაძეს 2015 წელის 18 სექტემბერს 12-წლიანი პატიმრობა მიესაჯა.