ავთანდილ წერეთლის სარჩელი თბილისის სააპელაციო სასამართლომ წარმოებაში არ მიიღო. ამის შესახებ „ინტერპრესნიუსს“ ავთანდილ წერეთლის ადვოკატმა, კახა წერეთელმა განუცხადა.

ადვოკატის თქმით, წერეთელს ათ სექტემრამდე აქვს დრო, რომ მიიღოს გადაწყვეტილება გადაიხდის თუ არა გირაოს, თუმცა ასევე აღნიშნა, რომ ავთანდილ წერეთელი გირაოს გადახდას არ აპირებს.

„სააპელაციო სასამართლომ ჩათვალა, რომ პირველი ინსტანციის სასამართლოს საკითხი სრულყოფილად ჰქონდა განხილული, რასაც ჩვენ, რა თქმა უნდა, არ ვეთანხმებით, თუმცა, სხვა გზა არ არის, აღკვეთის ღონისძიების კუთხით სააპელაციოს გადაწყვეტილება საბოლოოა და ის აღარ საჩივრდება, შესაბამისად, ათ სექტემბრამდე გვაქვს დრო, რომ გადავწყვიტოთ კონკრეტულად რას ვაკეთებთ. ბატონი ავთო არ აპირებს ფულის გადახდას.

ფულის გადახდის გარდა, შესაძლებელია უძრავი ქონებაზე საუბარი და თუ არადა, თუ არც უძრავი ქონებით მოხდა უზრუნველყოფა და არც თანხით გადახდა, ასეთ შემთხვევაში, პროკურატურა უფლებამოსილია მიმართოს სასამართლოს უფრო მძიმე აღკვეთი ღონისძიების, ამ შემთხვევაში პატიმრობის თაობაზე“,- განაცხადა კახა წერეთელმა.

ცნობისთვის, 27 აგვისტოს თბილისის საქალაქო სასამართლომ ბიზნესმენ ავთანდილ წერეთელს აღკვეთის ღონისძიების სახით 500 000 ლარის ოდენობის გირაო შეუფარდა.

ავთანდილ წერეთელს ბრალი რამდენიმე დღის წინ წაუყენეს. პროკურატურა ბიზნესმენს „თიბისი ბანკის“ დამფუძნებლებისათვის, ბადრი ჯაფარიძისთვის და მამუკა ხაზარაძისთვისუკანონო შემოსავლების ლეგალიზებაში დახმარებას ედავება, რასაც თან ახლდა განსაკუთრებით დიდი ოდენობით შემოსავლის მიღება.

თბილისის სასამართლოს გადაწყვეტილების შემდეგ, ავთანდილ წერეთელმა განაცხადა, რომ ის სასამართლოს მიერ მისთვის აღკვეთის ღონისძიების სახით შეფარდებული 500 000-ლარიანი გირაოს გადახდას არ აპირებდა. თავის მხრივ, წერეთლის შვილი, სამაუწყებლო კომპანია „ტვ პირველის“ დამფუძნებელი, ვატო წერეთელი აცხადებდა, რომ თუკი, მათ ქონების ჩადება მოუწევდათ, ეს „ტვ პირველის“ შენობა იქნებოდა, ვინაიდან მათ ბიზნესი აღარ აქვთ.

იხილეთ ვიდეო: ავთანდილ წერეთლის სარჩელი თბილისის სააპელაციო სასამართლომ წარმოებაში არ მიიღო