აქცია „სირცხვილიას“ მონაწილეების ინფორმაციით, რომელთაც ახალდანიშნული პრემიერ-მინისტრისთვის „სირცხვილის დერეფნის“ მოწყობა სურდათ, გიორგი გახარია პარლამენტიდან „სხვა გასასვლელით გააპარეს“.

აღნიშნულის გამო აქციის მონაწილეებმა გახარიას „მშიშარა“ უწოდეს.

„მშიშარა, მშიშარა!“-სკანდირებდნენ აქციის მონაწილეები რამდენიმე წუთის განმავლობაში.

ამჟამად აქციის მონაწილეებმა საკანონმდებლო ორგანოს წინ გადაინაცვლეს, სადაც მათივე თქმით, 19:00 საათზე აქცია „სირცხვილია“ განახლდება.

ამასთან, აქციის მონაწილეებმა პარლამენტის მიმდებარე ტერიტორია ყვითელი ლენტით შემოსაზღვრეს, რაც აქციის ერთ-ერთი ორგანიზატორის, გიგა მაქარაშვილის თქმით, სიმბოლურ დატვირთვას ატარებს, რადგან ეს ტერიტორია არის დანაშაულის ადგილი.

„ესაა დანაშაულის ადგილი და გვინდა, რომ ეს ადგილი შემოვსაზღვროთ. ყველამ უნდა ნახოს, რომ ამ ადგილზე დანაშაული ჩაიდინეს ამ წუთას, როდესაც კიდევ ერთხელ თავს ლაფი დაისხა ჩვენმა ქვეყანამ, დაგვცინა ჩვენმა სახელმწიფომ, როცა მოძალადე შინაგან საქმეთა მინისტრი გადადგა პრემიერ-მინისტრად. ეს ადგილი დანაშაულის ადგილია უკვე დიდი ხანია და ამ დანაშაულის ადგილზე აუცილებლად ერთად ვიმარჯვებთ,“- განუცხადა გიგა მაქარაშვილმა „პალიტრანიუსს“.