ხელისუფლება ცდილობდა პროცესში არ ჩავრთულიყავით, თუმცა ეს ჩვენთვის პრობლემა არ არის, რადგან წარმოდგენილი კანდიდატების გამოცდილებას მაინც შევისწავლით, - ამის შესახებ „საერთაშორისო გამჭვირვალობა- საქართველოს“ აღმასრულებელმა დირექტორმა ეკა გიგაურმა, მოსამართლეების შერჩევასთან დაკავშირებით სამუშაო ჯგუფის შეხვედრის შესახებ განაცხადა.

მისი თქმით, მმართველი გუნდი ცდილობს აღნიშნულ პროცესში არასამთავრობო სექტორი ნაკლებად იყოს ჩართული.

„მმართველი გუნდი სხვადასხვა ქვეყნის მოდელებს კი არ უნდა ეძებდეს იმისთვის, რომ ამ პროცესიდან გარიყოს სამოქალაქო სეტქორი, არამედ უნდა გააკეთოს ყველაფერი იმითვის, რომ ეს პროცესი მაქსიმალურად გამჭვირვალედ წარიმართოს. ჩვენი ქმედებები ამით ნამდვილად არ შეიზღუდება, რადგან წარმოდგენილი კანდიდატების გამოცდილებას მაინც შევისწავლით და რა გახმაურებულ საქმეებში იყვნენ ისინი ჩართულნი „ნაციონალური მოძრაობის“ და ამ მთავრობის პერიოდში, ამასაც ვაცნობებთ საზოგადოებას. მიდგომა იყო ის, რომ ხელისუფლება ცდილობდა ამ პროცესში არ ჩავრთულიყავით, თუმცა ეს ჩვენთვის პრობლემა არ არის“,- აღნიშნა გიგაურმა.