ქართული პოლიციის პოსტის მოხსნა და სოფელ წნელისის ტერიტორიიდან საქართველოს შეიარაღებული ძალების გაყვანა, შექმნილ პრობლემას გადაწყვეტდა.

„რეს“-ის ინფორმაციით, ამის შესახებ სამხრეთოსური დელეგაციის ხელმძღვანელმა ინციდენტების პრევენციისა და მათზე რეაგირების ფარგლებში იგორ კოჩიევმა განაცხადა.

„თუკი ქართული მხარე გადადგამს ამ ნაბიჯს, ოსური მხარის მიერ მიღებული იქნება შესაბამისი ზომები დაძაბულობის მოხსნის კუთხით“, - განაცხადა კოჩიევმა.

მისი თქმით, დღევანდელი ტექნიკური შეხვედრა კონკრეტული შედეგების გარეშე დასრულდა, რადგან ქართული მხარე უარს ამბობს პოსტის მოხსნაზე, რასაც იმით ხსნის, რომ პოსტი საფრთხეს არავის უქმნის და იქ პოლიციელთა შეზღუდული რაოდენობაა განთავსებული.

კოჩიევის თქმით, ეს სამხრეთოსური მხარისთვის მიუღებელია.

ოსი ჟურნალისტები დაინტერესდნენ გავრცელებული ინფორმაციით, რომელიც ეხებოდა ქართული პოსტების გაძლიერებას და ე.წ. სამხრეთ ოსეთის „საზღვართან“ ამერიკელი სამხედროების ყოფნას. კოჩიევის თქმით, „საზღვართან“ ამერიკელი სამხედროები არ იმყოფებიან.

კოჩიევმა ასევე განაცხადა, რომ დიალოგი კვლავაც გაგრძელდება, რადგან მისი თქმით, საუბარი აუცილებელია და საკითხის გადაწყვეტის მიღწევა მხოლოდ მშვიდობიანი გზით იქნება შესაძლებელი.