საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე გაეროს ბავშვის უფლებათა კომიტეტის 82-ე სესიაზე სიტყვით გამოვიდა. როგორც „ინტერპრესნიუსს“ საქართველოს პარლამენტიდან აცნობეს, სესიაზე საქართველოს მიერ წარდგენილი ორი ანგარიში განიხილეს, რომელიც ბავშვებით ვაჭრობის, ბავშვთა პორნოგრაფიის, პროსტიტუციის და შეიარაღებულ კონფლიქტებში ბავშვთა მონაწილეობის საკითხებს ეხება.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ კომიტეტზე „ბავშვის უფლებათა კოდექსზე“ და სოციალური მუშაკის რეფორმაზე ისაუბრა, რომლებიც ფუნდამენტურ სიახლეებს ითვალისწინებს სექსუალური ექსპლუატაციის, პროსტიტუციისა და ბავშვთა პორნოგრაფიისგან ბავშვთა დაცვის კუთხით.

გაეროს ბავშვის უფლებათა კომიტეტი 18 დამოუკიდებელი ექსპერტისგან შედგება, რომლებიც მონიტორინგს უწევენ ბავშვის უფლებათა კონვენციის ინპლემენტაციას გაეროს წევრ ქვეყნებში.