საქართველოს პრეზიდენტის სალომე ზურაბიშვილის საპარლამენტო მდივანი დიმიტრი გაბუნია დღეს ბრიფინგს გამართავს. ბრიფინგი პრეზიდენტის სასახლეში 11:00 საათზე არის ჩანიშნული.

ამ დროისთვის უცნობია, უკავშირდება თუ არა ბრიფინგი პრეზიდენტის მიერ მიღებულ გადაწყვეტილებებს შეწყალებასთან დაკავშირებით.

შეგახსენებთ, რომ საქართველოს პრეზიდენტმა 28 აგვისტოს 35 პირი შეიწყალა, რომელთა შორის იყვნენ 2014 წელს პოლიციელ თარაშ მუკბანიანის მკვლელობისთვის და 2004 წელს დავით ოთხმეზურის მკვლელობისთვის მსჯავრდებული პირები.

პრეზიდენტის ეს გადაწყვეტილება გააკრიტიკეს როგორც ოპოზიციის, ისე „ქართული ოცნების“ წევრებმა. ამასთან, სახალხო დამცველმა მოუწოდა პრეზიდენტს, დააკმაყოფილოს მომეტებული საზოგადოებრივი ინტერესი და საზოგადოებას დამატებითი ინფორმაცია მიაწოდოს მის მიერ მიღებული გადაწყვეტილებების მიზანშეწონილობასა და არგუმენტაციასთან დაკავშირებით.