"ცენტრ პოინტის" მიერ დაზარალებულები თბილისის საქალაქო სასამართლოსთან აქციას მართავენ. აქციის მონაწილეები პატრიარქს, პრემიერ-მინისტრს, პრეზიდენტსა და ბიძინა ივანიშვილს მიმართავენ.

ერთ-ერთი დაზარალებულის, მარიამ ჩიმაკაძის განცხადებით, 2012 წელს ბიძინა ივანიშვილი დაზარალებულებს შეხვდა დასამართლიანობის აღდგენას დაპირდა.

"სამართლიანობის აღდგენა არ ნიშნავს იმას, რომ დამნაშავეები ციხეში ისხდნენ. ჩვენ ისევ დაზარალებულები ვართ 15 წელია. მოვითხოვთ, მშენებლობები დასრულდეს. 4 500-მდე ოჯახი ვართ და ბოლოს და ბოლოს, ეს პრობლემა უნდა გადაწყდეს. ასე ცხოვრების გაგრძელება შეუძლებელია“, - განაცხადა დაზარალებულმა.

„ცენტრ პოინტ ჯგუფის“ საქმეზე, ბათუმის „თეთრი მაგნოლიას“ ეპიზოდზე ბრალდებულების, მაია და გუკა რჩეულიშვილების სასამართლო პროცესი დღეს, 16:00 საათზე გაიმართება.

ცნობისთვის, „თეთრი მაგნოლიას“ ეპიზოდზე ბრალდებულები არიან მაია და გუკა რჩეულიშვილები. მათ სახელმწიფო ბრალდება მენაშენეების კუთვნილი დიდი ოდენობით თანხების მითვისებას ედავება.