საქართველო მიმზიდველია ინვესტირებისთვის სხვადასხვა სექტორის მიმართულებით. თქვენი ქვეყნის ეკონომიკა იმდენად დივერსიფიცირებულია, რომ თითოეულ გერმანელ ინვესტორს შეგვიძლია მისთვის სასურველი ნიშა შევთავაზოთ, - ამის შესახებ გერმანიის ეკონომიკური გაერთიანების მმართველი საბჭოს თავმჯდომარე საშა ტერნესმა სასტუმრო „ბილტმორში“ გამართული ქართულ-გერმანული ბიზნეს შეხვედრის დასრულების შემდეგ განაცხადა.

„ჩვენ ვამაყობთ, რომ გერმანიასა და საქართველოს შორის ასეთი მჭიდრო ბიზნეს ურთიერთობებია. სწორედ ამიტომაა, რომ ჩვენი ბიზნესასოციაცია ასე სწრაფად იზრდება ბოლო წლების განმავლობაში. 12 წელია, რაც ვარსებობთ და უკვე 200 წევრი გვყავს. საქართველოს ეკონომიკის მინისტრთან შეხვედრისას ჩვენ განვიხილეთ ბიზნეს შესაძლებლობები და ის გამოწვევები, რომელიც უნდა დავძლიოთ ინვესტიციების ნაკადის, ვაჭრობის მოცულობისა და ბიზნეს ურთიერთობების შემდგომო ზრდისა და განვითარებისთვის,“ - განაცხადა საშა ტერნესმა.

ეკონომიკის სამინისტროს ინფორმაციით, შეხვედრაში მონაწილეობა მიიღეს გერმანიის პრეზიდენტმა ფრანკ-ვალტერ შტაინმაიერმა და საქართველოს ეკონომიკისა და მდგრადი განვითარების მინისტრმა ნათია თურნავამ. დისკუსიას ასევე დაესწრნენ მსხვილი ბიზნესის წარმომადგენლები როგორც საქართველოდან, ასევე გერმანიიდან.