დღეს მიენიჭებათ თუ ხვალ სტატუსი, მთავარია მათი უფლებები იყოს დაცული, - ასე გამოეხმაურა დეპუტატი ანრი ოხანაშვილი საია-ს მიერ გამოქვეყნებულ ინფორმაციას, რომლის თანახმადაც 20 ივნისის მოვლენებისას დაზარალებულად 67 სამართალდამცველი და 4 მოქალაქე დასახელდა.
„მე დეტალურ თანაფარდობასთან დაკავშირებით ვერ გეტყვით, ეს კონკრეტული მონაცემები შეგიძლიათ დააზუსტოთ და გადაამოწმოთ შინაგან საქმეთა სამინისტროში. თუმცა, ჩემთვის მნიშვნელოვანია ის ადამიანები, ვინც იქ დაზარალდნენ და ეს არის ფაქტი, ეს ადამიანები ჩემთვის არიან დაზარალებულები - დღეს მიენიჭებათ თუ ხვალ სტატუსი, მთავარია მათი უფლებები იყოს დაცული, ეს არის ჩემთვის ამოსავალი პრინციპი. თუკი ჩვენ დავინახავთ, რომ მათ უფლების რეალიზების შესაძლებლობა არ აქვთ, ამასთან დაკავშირებით ჩვენც დავსვამთ შეკითხვებს, თუმცა ამ ეტაპზე მივცეთ საგამოძიებო ორგანოებს საშუალება, თავისი საქმიანობა განახორციელონ.
ჩემი ამოცანაა, რომ ნებისმიერ ადამიანს, ვინც იქ დაზარალდა, უფლებების სრული რეალიზება უნდა მიეცეთ. თუკი ვინმე იქნება შეზღუდული ამ უფლებასთან დაკავშირებით, რა თქმა უნდა, ჩვენც დავსვამთ შეკითხვებს",- განაცხადა ანრი ოხანაშვილმა.