საკრებულოს ბრალდებული დეპუტატის ილია ჯიშკარიანის საქმის პროკურორის, თამარ იაკობიძის განცხადებით, ჯიშკარიანისთვის შეფარდებული აღკვეთის ღონისძიება სრულად უზრუნველყოფს მოსალოდნელ საფრთხეებს.

რაც შეეხება იმ ფაქტს, თუ რატომ მოითხოვა მძიმე ბრალის მიუხედავად, პროკურატურამ საკრებულოს დეპუტატის მიმართ, აღკვეთის ღონისძიების სახით გირაოს გამოყენება, პროკურორი იაკობიძე აცხადებს, რომ გირაო და დამატებითი ვალდებულებები საფრთხეებს უზრუნველყოფს.

„დამატებით ვალდებულებად მას აეკრძალა სასამართლოს საბოლოო გადაწყვეტილებამდე მსხვერპლთან მიახლოება. ასევე, მას სპეციალური ნებართვის გარეშე საქმეზე დაკითხულ მოწმეებთან კომუნიკაცია აეკრძალა.

აღკვეთი ღონისძიების გამოყენებას აქვს თავისი მიზნები. მოცემულ შემთხვევაში, ბრალდების მხარემ შეაფასა და მიიჩნია, რომ ბრალდებულის მხრიდან აღკვეთის ღონისძიების მიზნების მიღწევა შესაძლებელი იყო გირაოს გამოყენების შემთხვევაში დამატებით ვალდებულებებთან ერთად, რომელიც ბრალდების მხარემ მოითხოვა. თუ ილია ჯიშკარიანის მხრიდან დაიღრევა აღკვეთის ღონისძიების რომელიმე მოთხოვნა, რა თქმა უნდა, ბრალდების მხარე მიმართავს უფრო მკაცრი აღკვეთის ღონისძიებას", - განაცხადა იაკობიძემ.

კითხვაზე, არის თუ არა საფრთხე, ჯიშკარიანმა მტკიცებულებები გაანადგუროს, პროკურორი აცხადებს, რომ ბრალდების მხარემ მიიჩნია, რომ გირაო საფრთხეებს უზრუნველყოფს. ამასთან, პროკურორი ადასტურებს, რომ დაზარალებული თამთა თოდაძის კუთვნილი მობილური ტელეფონი ამ დრომდე ამოღებული არ არის.