იაპონიაში ტაიფუნ „ჰაგიბისის“ შედეგად დაღუპულთა რიცხვმა 37-ს მიაღწია, დაკარგულად კი 20 ადამიანი ითვლება, - ამის შესახებ ინფორმაციას „ბიბისი“ ავრცელებს.

მათივე ინფორმაციით, სამძებრო-სამაშველო ოპერაციაში ქვეყნის მასშტაბით 110 000 მაშველია ჩართული.

ტაიფუნმა ქვეყნის 8 პრეფექტურა დააზარალა. 92 000 ოჯახი ელექტროენერგიის გარეშეა დარჩენილი. ევაკუაციის რეკომენდაცია 7 მილიონამდე მოქალაქეს მისცეს, თუმცა, რეალურად თავშესაფრებს 50 000 ადამიანმა შეაფარა თავი. სტიქიის გამო რაგბის მსოფლიო ჩემპიონატის სამი მატჩი გაუქმდა.

მეტეოროლოგების ინფორმაციით, ამ დროისთვის ტაიფუნი მნიშვნელოვნადაა შესუსტებული.