24-26 ოქტომბერს, შოთა რუსთაველის საქართველოს ეროვნული სამეცნიერო ფონდის მხარდაჭერით, ივანე ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტის, პარლამენტის ეროვნული ბიბლიოთეკის, საქართველოს საბიბლიოთეკო ასოციაციისა და საქართველოს ანთროპოლოგთა ასოციაციის ორგანიზებით თბილისში საერთაშორისო კონფერენცია „ეთნოკულტურული მრავალფეროვნება და ინტერკულტურული კომუნიკაცია საქართველოში“ იმართება.

როგორც „ინტერპრესნიუსს“ რუსთაველის ფონდიდან აცნობეს, 24 ოქტომბერს, კონფერენციის მონაწილეებს სიტყვით მიმართა და წარმატება უსურვა შოთა რუსთაველის საქართველოს ეროვნული სამეცნიერო ფონდის გენერალური დირექტორის მოადგილემ ჯაბა სამუშიამ, რომელმაც კონფერენციის მნიშვნელობაზე ისაუბრა და აღნიშნა, რომ ინტერკულტურული და ეთნოკულტურული კომუნიკაციის საკითხები არ არის მხოლოდ სამეცნიერო დისპუტის თემა და ის მჭიდროდაა გადაჯაჭვული თანამედროვე ქართული სახელმწიფოს წინაშე მდგარ გამოწვევებთან.

ასევე, ჯაბა სამუშიამ დამსწრე საზოგადოებას ინფორმაცია რუსთაველის სამეცნიერო ფონდის ახალი პროექტების - კავკასიოლოგიური მიმართულების კონკურსის, ოკუპირებული ტერიტორიების შემსწავლელი სამეცნიერო კვლევების კონკურსის შესახებ, საქართველოს საზღვრისპირა რეგიონების შესწავლის აუცილებლობაზე მიაწოდა.

„ინტერკულტურული კომუნიკაციის საკითხი თანამედროვე მსოფლიოში მიმდინარე პროცესების (გლობალიზაცია, მიგრაციები, კონფლიქტები) გამო განსაკუთრებულ დატვირთვას იძენს. საქართველო ისტორიულად გამორჩეული ქვეყანაა თავისი მრავლაფეროვნებით, რამაც განაპირობა მშვიდობიანი თანაცხოვრების ტრადიციული სისტემებისა და ჯგუფთაშორისი საკომუნიკაციო არხების ჩამოყალიბება; განსაკუთრებული ეთნოგრაფიული რეალიებისა და ქცევის მოდელების განვითარება. აქ მულტიკულტურულ გარემოში უძველესი დროიდან უწყვეტი იყო ურთიერთობა განსხვავებული ეთნოკულტურული, რელიგიური თუ ლინგვისტური ჯგუფების წარმომადგენელთა შორის. უწყვეტი პროცესი იყო კულტურათაშორისი ურთიერთობები, მთელ რიგ რეალიათა გაცვლა და გაზიარება. დროთა ვითარებაში პოლიტიკური, ეკონომიკური და სოციეტალური სიტუაციის ცვლილება იწვევდა საქართველოს ეთნო-კულტურული რუკის ცვლილებებს, რაც თავის მხრივ გავლენას ახდენდა ინტერკულტურულ კომუნიკაციაზე. ამ საკითხების კვლევა და დისკუსია მათ ირგვლივ წვლილს შეიტანს თანამედროვე გამოწვევების ანალიზში,“ - განაცხადა ჯაბა სამუშიამ.

კონფერენციაში მონაწილეობას კანადის, თურქეთის, გერმანიის, პოლონეთის, ფინეთის, სომხეთის სამეცნიერო ცენტრების წარმომადგენლები მიიღებენ.