ახალგორში დაშავებული 67 წლის თამარ გიგაური კვლავ დე ფაქტო რეჟიმის კონტროლირებად ტერიტორიაზე რჩება. სოფელ იკოთის სკოლის პედაგოგი, რომელიც ოკუპირებულ დაბაში დაშავდა, ახალგორიდან ცხინვალის საავადმყოფოში გადაიყვანეს. დაშავებულს ზედა კიდურის მოტეხილობა და სხეულის მრავლობითი ტრავმული დაზიანებები აღენიშნება.
ახალგორის მუნიციპალიტეტის გამგებლის ნუგზარ თინიკაშვილის ინფორმაციით, გიგაურს მკურნალობა ტრავმატოლოგიურ განყოფილებაში უტარდება.
თამარ გიგაურმა სხეულის მრავლობითი დაზიანებები 7 მეტრის სიღრმის ჭაში ჩავარდნისას მიიღო. გიგაურის ოჯახის წევრები მესამე დღეა უშედეგოდ ითხოვენ, რომ დაშავებულს მკურნალობის საშუალება მიეცეს საქართველოს ცენტრალური ხელისუფლების მიერ კონტროლირებად ტერიტორიაზე.