ე.წ. სამხრეთ ოსეთის КГБ ქართულ მხარეს ცეცხლის გახსნაში ადანაშაულებს. მათი ინფორმაციით, 5 ნოემბერს, 18:00 საათზე, ხაშურის რაიონის სოფელ კობიდან, სადაც მათი თქმით, განთავსებულია ქართული პოლიციის დამატებითი ძალები, ე.წ. საზღვრის მიმართულებით დაუდგენელი პირების მიერ ავტომატური ცეცხლსასროლი იარაღიდან 10-15 გასროლა განხორციელდა. ამის შესახებ დე ფაქტო უწყებაზე დაყრდნობით, ადგილობრივი საინფორმაციო სააგენტო „რესი“ იუწყება.
მათივე ცნობით, მსხვერპლი არ არის, არც ინფრასტრუქტურა დაზიანებულა.
ცხინვალის КГБ-ს განცხადებით, დაძაბულობის დეესკალაციის ერთადერთი უალტერნატივო გზა „საზღვრისპირა“ რაიონში ქართული საპოლიციო პოსტის გაუქმებაა სოფელ წნელისთან.