საქართველოს ადმინისტრაციულ სამართალდარღვევათა კოდექსში ცვლილებების მიხედვით, „ჯორჯიან უოთერ ენდ ფაუერის“, „რუსთავის წყლისა“ და „მცხეთის წყლის“ მიერ ადმინისტრაციული სამართალდარღვევის საქმეზე გამოტანილი დადგენილებების ადრესატისთვის ჩაბარება თუ ვერ მოხდება, ის საჯაროდ გამოცხადდება.

როგორც „ინტერპრესნიუსს“ GWP-დან აცნობეს, თუ დადგენილებების ადრესატისთვის ჩაბარება სხვადასხვა მიზეზის გამო ვერ მოხერხდა, დადგენილებები საჯაროდ განთავსდება კომპანიების ვებგვერდზე და სამართალდამრღვევისთვის ჩაბარებულად ჩაითვლება მისი საჯაროდ განთავსებიდან მე-3 დღეს.

„შეგახსენებთ, რომ საქართველოს კანონმდებლობის შესაბამისად, ადმინისტრაციული სამართალდარღვევის საქმეებზე მიღებული დადგენილება მხარეს ფოსტის მეშვეობით ეგზავნება დადგენილების გამოტანიდან 3 სამუშაო დღის ვადაში. ინფორმაციის საჯაროდ განთავსებამდე ადრესატს დადგენილება ფოსტის მეშვეობით ორჯერ ეგზავნება.

დადგენილებების საჯაროდ განთავსებასთან დაკავშირებული ცვლილება ძალაში 2019 წლის 24 ოქტომბრიდან შევიდა“, - ნათქვამია ინფორმაციაში.