საპარლამენტო უმრავლესობის წევრი, რომან კაკულია ადასტურებს, რომ ევროპასთან ინტეგრაციის კომიტეტის თავმჯდომარის პოსტზე მისი კანდიდატურა განიხილება. ამის შესახებ „ინტერპრესნიუსს“ რომან კაკულიამ განუცხადა.
ამასთან, როგორც კაკულიამ აღნიშნა, მასთან ერთად, ევროპასთან ინტეგრაციის კომიტეტის პოსტზე სხვა კანდიდატურებიც განიხილებიან. მისი თქმით, მმართველ გუნდში მიმდინარეობს კონსულტაციები და უახლოეს დღეებში გახდება ცნობილი, თუ ვინ დაიკავებს ევროპასთან ინტეგრაციის კომიტეტის თავმჯდომარის თანამდებობას.
კაკულიას თქმით, ამ სფეროში შესაბამისი გამოცდილება აქვს.
„კონსულტაციები ნამდვილად მიმდინარეობს ამ თემაზე, ჩემთვის ეს უცხო სფერო ნამდვილად არ არის. მთელი ჩემი სახელმწიფო, სამსახურეობრივი კარიერა ევროკავშირთან დაკავშირებულ საქმიანობას უკავშირდება, თუმცა არსებობობენ სხვა კანდიდატურებიც და გუნდში მიმდინარეობს მსჯელობა ამასთან დაკავშირებით. უახლოეს დღეებში მივიღებთ საბოლოო გადაწყვეტილებას“, - განაცხადა რომან კაკულიამ „ინტეპრენისუსთან“.
ევროპასთან ინტეგრაციის კომიტეტის თავმჯდომარემ თამარ ხულორდავამ პოსტი მას შემდეგ დატოვა, რაც 14 ნოემბერს პარლამენტმა პროპორციულ საარჩევნო სისტემასთან დაკავშირებით კანონპროექტი ჩააგდო.
