ბერლინში გერმანიის ყოფილი პრეზიდენტის რიჩარდ ფონ ვაიცეკერის შვილი ფრიც ფონ ვაიცეკერი მოკლეს, - ამის შესახებ ინფორმაციას „დოიჩე ველე“ ავრცელებს.

გამოცემის ცნობით, 59 წლის ფრიც ფონ ვაიცეკერს სასიკვდილო ჭრილობა ცივი იარაღით მაშინ მიაყენეს, როდესაც ის ბერლინის ერთ-ერთ ჰოსპიტალში ლექციას ატარებდა.

პოლიციამ თავდამსხმელი მკვლელობიდან ცოტა ხანში ხალხის დახმარებით დააკავა.

გავრცელებული ინფორმაციით, დაჭრილია კიდევ ერთი ადამიანი, რომელიც თავდამსხმელის შეჩერებას ცდილობდა.

მკვლელობის მოტივი ჯერჯერობით უცნობია. სამართალდამცავებმა მკვლელობის ფაქტზე გამოძიება დაიწყეს.

ფრიც ფონ ვაიცეკერს სამედიცინო სფეროში მრავალწლიანი წარმატებული კარიერა ჰქონდა. სხვადასხვა დროს ის მუშაობდა ფრაიბურგის, ბოსტონის და ციურიხის კლინიკებში. 2015 წლიდან კი გასტროენტეროლოგიის განყოფილებას ხელმძღვანელობდა იმ კლინიკაში, სადაც მკვლელობა მოხდა.