საქართველოს საგანგებო და სრულუფლებიანმა ელჩმა ქუვეითის სახელმწიფოში კონსტანტინე ჟღენტმა ქუვეითის ემირს, შეიხ საბაჰ ალ აჰმად ალ ჯაბერ ალ საბაჰს რწმუნებათა სიგელი გადასცა, - ამის შესახებ „ინტერპრესნიუსს“ საგარეო საქმეთა სამინისტროდან აცნობეს.

საგარეო უწყების ინფორმაციით, რწმუნებათა გადაცემის საზეიმო ცერემონიის შემდეგ გამართულ შეხვედრაზე ემირმა აღნიშნა, რომ ქუვეითი ორ ქვეყანას შორის არსებულ მეგობრულ ურთიერთობებს აფასებს და ქუვეითსა და საქართველოს შორის ურთიერთობების შემდგომ განვითარებას მიესალმება.

საქართველოს ელჩმა, თავის მხრივ, მადლობა გადაუხადა ქუვეითის ემირს საქართველოს სუვერენიტეტისა და ტერიტორიული მთლიანობის მხარდაჭერისთვის.

ქუვეითის ემირმა საქართველოს ახლად დანიშნულ ელჩს მომავალ დიპლომატიურ საქმიანობაში წარმატებები უსურვა.