ანა დოლიძე ბიძინა ივანიშვილს და მიხეილ სააკაშვილს - თქვენი მენტალური პენსიის დროა

იუსტიციის უმაღლესი საბჭოს არამოსამართლე წევრმა ანა დოლიძემ სოციალური ქსელით ბიძინა ივანიშვილს და მიხეილ სააკაშვილს მიმართა.

როგორც ანა დოლიძე სოციალურ ქსელში წერს, ივანიშვილის და სააკაშვილის მენტალური პენსიის დროა.

„გწერთ ადამიანი, რომელიც ეცადა თქვენი ორივეს მიერ აშენებული ციხეების დანგრევას. თქვენ ჩვენ დაგვღალეთ. თქვენი ეგოების პერფორმანსები ისევე მოსაწყენია, როგორც ყოველ ახალ წელს ახლიდან ნაჩვენები გაცვეთილი რუსული კომედია. აქაც წინასწარ ვიცით, რაც მოხდება. თქვენი საკუთარ თავისთვის თავმომწონეობას მიჰყვება ქვეყანა. რაც ნაკლებ განცხადებებს გააკეთებთ, მით უკეთესია, იმიტომ, რომ ზუსტად ვიცით უკვე მათში რა ითქმის. ყველაზე ადეკვატური თქვენ შორის ორთაბრძოლაში, რომელსაც ქვეყანა მიჰყვება, ერთი კარგი ფროიდიანული ფსიქოანალიტიკოსი იქნებოდა. ყოველ შემთხვევაში, თქვენი განცხადებები იმდენად ცდება ქვეყნის ინტერესებს, რომ ისინი მხოლოდ და მხოლოდ კარგ ფსიქოანალიტიკურ საკვლევ მასალას თუ წარმოადგენს.

თქვენს თვალსაწიერში არ არის არც დაღლილი ხალხი, არც მშრომელი ემიგრანტები, არც მშიერი და ქუჩაში დაყრილი მოხუცები და ბანკში წინასწარ დატოვებული მათი პენსიები, არც სიცივეში გათბობის გარეშე დარჩენილი ბავშვები, არც გამონაბოლქვით მსუნთქავი მოსწავლეები, არც დაღლილი დემონსტრანტები და პოლიციელები, არც აყრილი გზები და არც კორპუსებს გარეშე დარჩენილი რამდენიმე კვადრატული მეტრი, არც დეპრესიაში ჩავარდნილი მოზარდები და ავარიებისგან დაშლილი ოჯახები. ეს ზუსტად ვნახეთ და ვიცით.

თქვენ შეპყრობილნი ხართ ერთმანეთთან ეგო შეტაკებებით, ჩვენი კი ვოცნებობთ სულ სხვა ქვეყანაზე“, -წერს ანა დოლიძე.

ამასთან, მან აღნიშნა, რომ ივანიშვილი და სააკაშვილი ხალხს ასეთ ქვეყანას ვერ მოუტანენ.

„არა იმიტომ, რომ არ შეგიძლიათ, არამედ იმიტომ, რომ თქვენს სამყაროში არსებობს მხოლოდ თქვენი დუელი, სადაც ხალხს მხოლოდ სეკუნდანტების როლიღა დაგვრჩა. იმ სეკუნდანტების, რომლებიც ამასობაში დაბერდნენ.

მოკლედ, თქვენი მენტალური პენსიის დროა. დაგვღალეთ. წადით, ერთად წადით და ერთმანეთს ლოტო ეთამაშეთ, ან ჭადრაკი, ან დომინო. აზარტულს ნუ ითამაშებთ რამეს, შეჩვევა იცის“, - წერს ანა დოლიძე.

იოსებ ბარათაშვილი - ახლა მთავარია, გამოძიებამ უტყუარად დაადგინოს იმ პირების ვინაობა, რომელთა ქმედებამაც გამოიწვია შაქარაშვილის გარდაცვალება
ქართული პრესის მიმოხილვა 10.07.2020
ალექსეი მალაშენკო - ვინც არ უნდა მოიგოს საქართველოს არჩევნებში, აფხაზეთისა და სამხრეთ ოსეთის საკითხებში არაფერი შეიცვლება, ამიტომ, კრემლისთვის პრინციპული მნიშვნელობა არ აქვს, ვინ გაიმარჯვებს
ყაზახეთ-საქართველოს თანამშრომლობის ახალი ეტაპი იწყება
სუბსიდირებული იპოთეკური სესხი - ახალი შესაძლებლობა ტერაბანკისგან
სილქნეტის მობილური აბონენტები თიბისის მობაილბანკით სარგებლობას ინტერნეტის დახარჯვის გარეშე შეძლებენ