პარლამენტის პირველი ვიცე-სპიკერი გია ვოლსკი მიიჩნევს, რომ "ევროპული საქართველოს" წევრები საპარლამენტო თანამდებობების დატოვებით ცდილობენ, საერთაშორისო პარტნიორებთან გარკვეული მესიჯები გაგზავნონ და სკანდალი შექმნან. ამის შესახებ მან ჟურნალისტებს განუცხადა.

მისივე თქმით, პარლამენტში მათთან თანამშრომლობა ნაყოფიერი არასდროს ყოფილა.

"ეს არის კივილ-წივილი, ცირკის მოწყობა - საქმეზე ლაპარაკი ჩვენ არასდროს გვქონია. ეს ფაქტია და თუ ამას იმას დაუმატებენ, რომ თანამდებობებიდან წავლენ, მხოლოდ იმისთვის, რომ სკანდალური შეკითხვები გამოიწვიონ და მესიჯები გააგზავნონ საერთაშორისო დონეებზე,"- აცხადებს გია ვოლსკი.

პირველი ვიცე-სპიკერი პარლამენტში ახალი ფრაქციის შექმნასაც გამოეხმაურა და იმედი გამოთქვა, რომ ისინი პოპულიზმზე უარს იტყვიან.

"ამ ჩემმა კოლეგებმა თავი წარმოაჩინეს გარკვეული პოზიციით, რომელსაც სიღრმისეული შეფასება სჭირდება და არა ზედაპირზე გადასვლა და სკანდალური თემის მოგონება. ვისგან არიან ინსტრუქტირებულნი, მომავალი გვიჩვენებს. ვფიქრობ, საკმაოდ კრიტიკულები არიან, მაგრამ დიდი იმედი მაქვს, არ გაცდებიან და პოპულიზმში არ გადაიჭრებიან როგორც ზოგიერთი ჩვენი ყოფილი წევრი უმრავლესობის,"- განაცხადა გია ვოლსკიმ.