ერაყის უსაფრთხოების ძალებმა გუშინ, ირანის საკონსულოზე თავდასხმის შემდეგ, 45 დემონსტრანტი მოკლეს, - ამის შესახებ ინფორმაციას „როიტერსი“ ავრცელებს.
გამოცემის ცნობით, სულ მცირე 29 ადამიანი დაიღუპა ქალაქ ნასირიას სამხრეთით, როდესაც უსაფრთხოების ძალებმა ცეცხლი გაუხსნეს აქციის მონაწილეებს, რომლებმაც ხიდის ბლოკირება განახორციელეს. პოლიციისა და მედიკოსების ინფორმაციით, დაჭრილია ათეულობით ადამიანი.
რამდენიმე დემონსტრანტი მოკლეს სამართალდამცავებმა ქვეყნის დედაქალაქ ბაღდადში მდინარე ტიგროსთან ახლოს, სადაც აქციის მონაწილეების წინააღმდეგ საბრძოლო და რეზინის ტყვიები გამოიყენეს.
მედიის ცნობით, უსაფრთხოების მიზნით ირანმა ერაყთან დამაკავშირებელი მეჰრანის სასაზღვრო გადასასვლელი ჩაკეტა.
შეგახსენებთ, რომ ერაყში საპროტესტო აქციები 1 ოქტომბრიდან დაიწყო. მოსახლეობა ქვეყანაში არსებულ მძიმე ეკონომიკურ მდგომარეობას, უმუშევრობასა და კორუფციის მაღალ დონეს აპროტესტებს და ხელისუფლების გადადგომას მოითხოვს.
