საკმაოდ აგრესიული საარჩევნო კამპანია მიმდინარეობს ორ პოლიტიკურ ძალას შორის, ეს კი ივანიშვილს აწყობს, იმიტომ რომ, კარგად გამოსდის „ნაცებისგან“ მტრის ხატის შექმნა, - ამის შესახებ პარლამენტის დამოუკიდებელმა დეპუტატმა, დავით ჭიჭინაძემ განაცხადა.

„დიმიტრი ხუნდაძემ თავის დროზე შეასრულა მავრის ფუნქცია და ახლა მას წასვლის დრო დაუდგა, თუმცა ამას ვერ ხვდება. ამიტომ, რაც უფრო დიდხანს დარჩება ხუნდაძე პარლამენტში, მით უფრო მძიმე ცხოვრება ექნება მომავალში.

შესაბამისად, აკაკი ზოიძე, მეტნაკლებად სინდისიანი ადამიანი, კი არ უნდა წასულიყო, დიმიტრი ხუნდაძე უნდა გადამდგარიყო, იმიტომ, რომ ვხედავთ მისი ინიციატივა ქვეყანას რა ძვირიც უჯდება.

რაც არ უნდა „წაგახალისონ“, მორალი და ზნეობა უნდა არსებობდეს ნებისმიერ ადამიანში. მაჟორიტარობა უსინდისობას ნამდვილად არ ნიშნავს“, - განაცხადა დავით ჭიჭინაძემ.