სახელმწიფოს ბლოკირება არის კანონმდებლობის მიღმა და ამას ვერავინ შეძლებს, - ამის შესახებ პარლამენტის თავმჯდომარემ, არჩილ თალაკვაძემ ჟურნალისტებს ოპოზიციის მიერ დაგეგმილ აქციასთან დაკავშირებით განუცხადა. თუმცა, როგორც თალაკვაძემ აღნიშნა, დაცული იქნება შეკრების და მანიფესტაციის უფლება.

„პარლამენტის მუშაობას ვერავინ შეაჩერებს, დაცული იქნება მანიფესტაციის უფლება და კანონის ფარგლებში ყველას შეუძლია გამოხატოს პროტესტი. მაგრამ სახელმწიფოს ბლოკირება არის უკვე კანონმდებლობის მიღმა და ამას ვერავინ შეძლებს“, - განაცხადა თალაკვაძემ.

კითხვაზე, იმ შემთხვევაში თუ მოხდება პარლამენტის შენობის ბლოკირება, კვლავ გამოიყენებენ თუ არა წყლის ჭავლს აქციის მონაწილეების დასაშლელად, თალაკვაძემ აღნიშნა: „რას ვიხილავთ და რას არ ვიხილავთ ეს არ არის ჩემი გადასაწყვეტი. ამაზე შესაბამისი ინსტიტუტები არიან პასუხისმგებლები“.