ეკა ბესელიას განცხადებით, იურიდიულ საკითხთა კომიტეტის სხდომა, სადაც მოსამართლეობის კანდიდატების კენჭისყრა უნდა გაიმართოს, კანონდარღვევით იმართება

დამოუკიდებელი დეპუტატის ეკა ბესელიას განცხადებით, იურიდიულ საკითხთა კომიტეტის სხდომა კანონის დარღვევით იმართება.

როგორც მან იურიდიული კომიტეტის სხდომაზე განაცხადა, თუ ახლა კომიტეტი კენჭისყრას კანონის დარღვევით დაიწყებს, ეს ამ „ისტორიულ პროცესს“ კიდევ ერთ მძიმე ლაქას დაუტოვებს.

მისივე თქმით, სასესიო კვირაში კომიტეტის სხდომის ჩატარება, პარლამენტის რეგლამენტის უხეში დარღვევაა, რადგან უზენაესი სასამართლოს მოსამართლეების არჩევა არ არის არც დაჩქარებული საკითხი და არც ბიუჯეტის პროექტი, რისი განხილვაც სასესიო კვირაში კანონით ნებადართულია.

ეკა ბესელია უმრავლესობის დეპუტატებს განმარტებას სთხოვს, თუ რატომ გადაწყვიტეს, მათ რეგლამენტის დარღვევა.

„ვიცი, რომ იურიდიულ საკითხთა კომიტეტი მიეჩვია რეგლამენტის დარღვევას და ასეთი რამდენიმე შემთხვევაა. როცა ასეთი მნიშვნელოვანი კენჭისყრაა დაგეგმილი მოსამართლეთა საკითხზე, ეს არც დაჩქარებული თემაა და არც ბიუჯეტია. არ შეიძლება საგამონაკლისო წესით გაიტანოთ, ის რაც არ წერია რეგლამენტში. და კიდევ ერთი დათქმა აქვს 88-ე მუხლს, რომ საჭიროების შემთხვევაში პარლამენტს დამსწრე ხმების უმრავლესობით, მაგრამ არანაკლებ პარლამენტის სრული შემადგენლობის 1/5-ისა ცვლილება შეაქვს თავისი მუშაობის განრიგში. ასეთი გადაწყვეტილება არ მიუღია პარლამენტს, რომ დაარღვიოს პარლამენტის ორკვირიანი ციკლი და სასესიო დღეს დანიშნოთ კომიტეტის სხდომა. რეგლამენტი ამას პირდაპირ კრძალავს“, - განაცხადა ბესელიამ.

აღნიშნულს იურიდიულ საკითხთა კომიტეტის თავმჯდომარემ ანრი ოხანაშვილმა უპასუხა, რომ კომიტეტის სხდომა რეგლამენტის სრული დაცვით დაინიშნა.

„რაც შეეხება პლენარული სხდომების კვირაში კომიტეტის ჩატარების საკითხს, ნებადართულია ნებისმიერ დროს საკითხის განხილვა თუ ეს არ არის კანონპროექტი. 34 -ე მუხლს იქნებ გაეცნოთ“, - განაცხადა ოხანაშვილმა.

გიორგი ანთაძე - საქართველო ვაშინგტონისა და თავისუფალი სამყაროს მთავარი სტრატეგიული პარტნიორია სამხრეთ კავკასიაში და ჩვენ ეს როლი და ფუნქცია ბოლომდე უნდა ავითვისოთ
ქართული პრესის მიმოხილვა 27.01.2021
ლილია შევცოვა - თუ აშშ საქართველოდან არ გასულა, ამერიკელები საქართველოში დაუპირისპირდებიან რუსულ გავლენებს, რომლებიც რამდენადაც ვიცი, ქვეყანაში საკმაოდ მრავლადაა
JTI-ს საუკეთესო დამსაქმებლის ჯილდო გადაეცა
სადაზღვევო კომპანია "ევროინს ჯორჯიას" დამფუძნებელი კომპანია Eurohold, ბულგარეთში ელექტროენერგიის უდიდესი მომწოდებელი კომპანიის მფლობელი გახდა