„უსამართლო სასამართლო“, „არა უდიპლომო მოსამართლეებს“, „ვითხოვთ კეთილსინდისიერ მოსამართლეებს, ვითხოვთ ღირსეულ მოსამართლეებს“ - ამ ტრანსპარანტებით არასამთავრობო ორგანიზაციების წარმომადგენლები პარლამენტის წინ მივიდნენ.

„პარლამენტში დღეს მიღებული გადაწყვეტილება უნდა ემსახურებოდეს ქვეყნის ინტერესებს. ქვეყნის ინტრესია ინდივიდუალურად თავისუფალი მოსამართლე და არა „კლანისა“ და ხელისუფლების მიერ მართული. შესაბამისად, ჩვენი პროტესტი ეს არის. იძულებული ვარ გამოვიდე პლაკატებით ხელში დავდგე იმის გამო, რომ სასამართლო სისტემაში შეუძლებელია ოთახებში ბრძოლით მიაღწიო რაიმე შედეგს. ძალიან მძიმე სიტუაციაა ჩინჩალაძის ხალხი გადის სასამართლო სისტემაში, უზენაეს სასამართლოში უმაღლეს თანამდებობებზე, რაც ჩვენი ქვეყნის ინტერესებს ნამდვილად არ ემსახურება. მართლმსაჯულება უნდა ემსახურებოდეს ხალხს და იქ უნდა იყვნენ ისეთი მოსამართლეები რომლებსაც ხალხი ენდობა. ჩინჩალაძის „კლანს“ ხალხი არ ენდობა და დღევანდელმა პროტესტმა ეს აჩვენა. მოლოდინი მქონდა, რომ მაქსიმუმ 5-6 კაცს დაუჭერდა პარლამენტი მხარს, თუმცა მოლოდინს გადააჭარბა იმ რაოდენობამ რასაც მხარი დაუჭირა“,- განაცხადა იუსტიციის უმაღლესი საბჭოს არამოსამართლე წევრმა ნაზი ჯანეზაშვილმა.

მასთან ერთად პლაკატებით ხელში პარლამენტის წინ ეკა გიგაური, გიორგი მშვენიერაძე და არასამთავრობო ორგანიზაციების სხვა წარმომადენლები არიან.

„დღეს ვართ მართლა კრიტიკულ ზღვარზე, რადგან დღეს წყდება თუ რა იქნება ჩვენს უზენაეს სასამართლოში, სადაც ყველამ უნდა ნახოს სამართალი. ამ მოსამართლეებისგან ეს მოლოდინი მე პირადად არ მაქვს და არც შეიძლება ვინმეს ჰქონდეს“, - განაცხადა ეკა გიგაურმა.