20.12.2019 / 10:15

ქართული პრესის მიმოხილვა 20.12.2019

რა მოხდება, თუ "ოცნებასთან“ მოალაპარაკება ჩაიშალა - ძაბირაძე ოპოზიციას მკვეთრი განცხადებების კეთებას არ ურჩევს

"არაფერი უთქვამს... პირდაპირ ყელსა და კისერში დაუსვა“ - სასიკვდილოდ გამეტებული პოლიციელი გამვლელებმა გადაარჩინეს

***

"იმ შემთხვევაში თუკი „ქართული ოცნებისა" და ოპოზიციის კიდევ ერთი შეხვედრა უშედეგოდ დასრულდება, იმედგაცრუებული ოპოზიცია მომავალი თვიდან საერთო ეროვნულ წინააღმდეგობას დაიწყებს. ამის შესახებ საუბრობს "ახალი საქართველოს" ლიდერი გიორგი ვაშაძე. თუმცა, ანალიტიკოსი, ვახტანგ ძაბირაძე „რეზონანსთან" საუბრისას აცხადებს, რომ ამას პერსპექტივა არ აქვს და ოპოზიციის წარმომადგენლებს ურჩევს, მსგავსი განცხადებების გაკეთებისგან თავი შეიკავონ”, - წერს გაზეთი "რეზონანსი“ სტატიაში სათაურით, რა მოხდება, თუ "ოცნებასთან“ მოალაპარაკება ჩაიშალა - ძაბირაძე ოპოზიციას მკვეთრი განცხადებების კეთებას არ ურჩევს

"დღეს, 20 დეკემბერს “ქართულ ოცნებისა" და ოპოზიციის წარმომადგენლებს შორის რიგით მეოთხე შეხვედრა გაიმართება, სადაც მთავარი განხილვის თემა კვლავ ახალი საარჩევნო სისტემა იქნება. ძაბირაძის თქმით, შეუძლია მშვიდად იყოს ვაშაძე, რადგან არანაირი შეთანხმება არ მოხდება და ვერ მოხდება. საერთო ეროვნულ წინააღმდეგობას ალბათ დაიწყებენ, მაგრამ დიდ პერსპექტივას ვერ ვხედავ, რომ ეს იქნება მასობრივი და შეუქცევად ხასიათს მიიღებს.იანვარი მკვდარი თვეა პოლიტიკისთვის, თანაც ოპოზიციას საზოგადოება ჯერ იმ კონდინციამდე არ მიუყვანია, რომ ეროვნული დაუმირჩილებლობის განხორციელება შეძლოს. ამ ეროვნულ დაუმორჩილებლობაზე 30 წლის განმავლობაში ბევრჯერ იყო ლაპარაკი, მაგრამ ვერ მოხერხდა მისი რეალიზება. დასადგენია რას გულისხმობენ ამ ეროვნულ დაუმორჩილებლობაში ოპოზიციის წარმომადგენლები," - აღნიშნავს გამოცემა.

"გიორგი ვაშაძე 20 დეკემბრის შეხვედრას გადამწყვეტს უწოდებს და ამბობს, რომ საარჩევნო სისტემასთან დაკავშირებით თუკი მხარეები კონსენსუსს ვერ მიაღწევენ, იანვრიდან საერთო ეროვნულ წინააღმდეგობას დაიწყებენ. ვაშაძის თქმით, ხვალინდელი დღე იქნება გადამწყვეტი, ჩემთვის პირადად, იმისთვის, რომ იანვრიდან, მე კოლეგებსაც ვესაუბრე ამასთან დაკავშირებით, ჩვენ უნდა დავიწყოთ საერთო ეროვნული წინააღმდეგობის მოძრაობა. ეს არის სრულიად სხვა შინაარსის, სრულიად სხვა მასშტაბის და სრულიად სხვა კომპონენტებისგან შემდგარი. უნდა დავამთავროთ „ქართული ოცნება", რადგან საქართველოს დღეს სჭირს უბედურება, ყოველდღიურად, რაღაც კატასტროფა გვჭირს უკვე და ამ უბედურების წარმომავლობა ერთადერთი არის „ქართული ოცნება". ეს უბედურება ჩვენ თუ არ მოვიშორეთ, არ დამთავრდება ხალხო, ქვეყანაში რაც ხდება. საშინელ მდგომარეობაში ვარ მეც პირადად ბოლო დღეებია და უფრო და უფრო მეტი იქნება ასეთი, უფრო და უფრო კატასტროფული იქნება, თუ არ დავამთავრეთ ეს უბედურება," - წერს სტატიის ავტორი.

“რა მოხდა ბათუმში და რა გახდა 29 წლის პატრულის თანამშრომლის ოთარ თავართქილაძის დაჭრის მიზეზი, სრულიად გაურკვეველია. შემთხვევა 18 დეკემბერს საღამოს საათებში ჭავჭავაძის ქუჩაზე სავაჭრო ცენტრ „პლაზასთან“ მოხდა. საპატრულო ეკიპაჟს, რომელიც ქუჩაზე მოძრაობდა, ახალგაზრდა მამაკაცმა ხელი დაუქნია და გაჩერება სთხოვა. პოლიცია ჩერდება და მოქალაქე მარჯვენა მხრიდან მანქანას უახლოვდება, მიახლოვებისთანავე კი ის პოლიციელს ყელის არეში ბასრ საგანს ურტყამს. პოლიციელი ინსტიქტურად თავის დაცვას ცდილობს და ხელს იშველიებს. მამაკაცი პატრულის თანამშრომელს ასევე ხელის არეშიც დაზიანებას აყანებს. ეს ყველაფერი კი ძალიან სწრაფად მოხდა. ამის შემდეგ დამნაშავე გაქცევას ცდილობს, თუმცა მას დაჭრილი პატრულის მეწყვილე მისდევს და რამდენიმე მეტრში აკავებს. თავართქილაძე მეწყვილესთან ყელზე ხელმიფარებული მიდის და ამოწმებს დააკვა თუ არა დამნაშავე. ამის შემდეგ კი უკან მანქანისკენ ბრუნდება, თუმცა ის გზაში იქცევა. თავართქილაძის დახმარება მოქალაქეებმა შეძლეს. გამოიძახეს სასწრაფო დახმარება, თუმცა მის მოსვლას აღარ დაელოდნენ, რადგანაც სისხლდენა სწრაფი იყო. დაჭრილი საავადმყოფოში მოქალაქის ავტომობილით გადაიყვანეს”, - წერს გაზეთი "რეზონანსი“ სტატიაში სათაურით, "არაფერი უთქვამს... პირდაპირ ყელსა და კისერში დაუსვა“ - სასიკვდილოდ გამეტებული პოლიციელი გამვლელებმა გადაარჩინეს

"დაჭრილი პოლიციელის ჯანმრთელობის მდგომარეობა საშუალო სიმძიმისაა. როგორც რესპუბლიკურ საავადმყოფოში „რეზონანსს“ განუცხადეს, პოლიციელი კონტაქტურია, თუმცა პრევენციისთვის მართვით სუნთქვაზე იმყოფება. საავადმყოფოში ამბობენ, რომ ოპერაცია წარმატებით დასრულდა და დაგვიდასტურეს ინფორმაცია, რომ პაციენტი კლინიკაში მოქალაქემ შეიყვანა. მას აღენიშნებოდა ორი ჭრილობა, რომელიც კისრის არეში ბასრი ნივთით იყო მიყენებული. მათი თქმით, ჭრილობა იყო ღრმა, დაზიანებული იყო მცირე ვენები და ხორხის ზედაპირი. ხელზე მცირედი, უმნიშვნელო ჭრილობა ჰქონდა. ჩატარდა ოპერაცია და დაუმუშავდა ჭრილობა. მედიკოსები ამბობენ, რომ პოლიციელის მდგომარეობა მძიმეა, მაგრამ სტაბილური. პოლიციელს დიდი სისიხლის დანაკარგი ჰქონდა, მაგრამ ჯამში კარგი დინამიკაა და მის სიცოცხლეს საფთხე არ ემუქრება. თვითმხილველები კი "რეზონანსთან“ ამბობენ, რომ მამაკაცი, რომელმაც პოლიციელი დაჭრა, არაფხიზელ მდგომარეობაში იყო. მათი თქმით, ის ქუჩაში მიდიოდა, ყვიროდა და იგინებოდა. სავარაუდოდ, არსებობს ეჭვი რომ მამაკაცი ნარკოტიკული ნივთიერების ზემოქმედების ქვეშ იყო”, - აღნიშნავს გამოცემა.

"დაჭრილი პოლიციელის ერთ-ერთი მეგობრი, გოჩა შავაძე „რეზონანსთან“ აცხადებს, რომ ოთარ თავართქილაძე საქართველოს მკლავჭიდელთა ნაკრების წევრია და ის საკმაოდ კარგი თანამშრომელია. მისივე თქმით, დამნაშავეს პოლიციელი არ იცნობდა და მათ მანქანა მხოლოდ იმიტომ გააჩერეს, რომ მოქალაქემ ხელი გაუქნიათ. ეგონათ, რომ რაღაც უჭირდა და დახმარებას სთხოვდა. მეგობარი ამბობს, რომ პოლიციელი ბეწვზეა გადარჩენილი, რადგანაც მედიკოსებმა იყოჩაღეს და მას სიცოცხლე შეუნარჩუნეს”, - დასძენს გამოცემა.

"ჩვენც ის ვიცით, რაც მედიით ყველამ ნახა. ოთარი თავის სამსახურეობრივ მოვალეობას ასრულებდა, როდესაც მისთვის სრულიად უცნობმა ადამიანმა დაჭრა. არც არაფერი უთქვამს, პირდაპირ მიუახლოვდა. მას ეგონა, რომ რაღაც უჭირდა და გასაუბრება უნდოდა. მან კი პირდაპირ ყელში და კისერში დაუსვა. „ექიმებმა იყოჩაღეს და მოქალაქეებმაც. ის მალევე საავადმყოფოში გადაიყვანეს. ძალიან კარგი ბიჭია, სპორტსმენი, მკლავჭიდელია. მისგან წყენა და რაიმე კონფლიქტი არავის ახსოვს. წლებია თავის პროფესიულ და სამსახურეობრივ მოვალეობას პირნათლად ასრულებს“, - აცხადებს მეგობარი „რეზონანსთან“. შინაგან საქმეთა სამინისტროში ამბობენ, რომ დააკავეს ერთი მამაკაცი, რომელიც ბათუმში პოლიციელს თავს დაესხა და ჭრილობა მიაყენა. უწყების ინფორმაციით, ის შემთხვევის ადგილზე პოლიციელის მეწყვილემ აიყვანა. გამოძიება სისხლის სამართლის 353-ე პრიმა მუხლით მიმდინარეობს, რაც პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმას გულისხმობს”, - წერს სტატიის ავტორი.