პროცედურულად, დღეს არსებობს იმის მოლოდინი, რომ დე ფაქტო რეჟიმის წარმომადგენლებმა დაკავებული ექიმის, ვაჟა გაფრინდაშვილის გათავისუფლების გადაწყვეტილება მიიღონ, - ამის შესახებ „ინტერპრესნიუსთან“ საქართველოს ადვოკატთა ასოციაციის ხელმძღვანელმა დავით ასათიანმა განაცხადა.
ასათიანის თქმით, ვაჟა გაფრინდაშვილის სასამართლო პროცესი ცხინვალში ამ წუთებში მიმდინარეობს და საქართველოს ადვოკატთა ასოციაციას ინტენსიური კავშირი აქვს იმ ადვოკატებთან, რომლებიც ქართველი ექიმის ინტერესებს იცავენ.
„ზოგადად, მოგეხსენებათ, ძალზე რთულია დე ფაქტო რეჟიმის გადაწყვეტილებებსა და შემდგომ ქმედებებზე პროგნოზირება, თუმცა ბუნებრივია იმედს არ ვკარგავთ, რომ დაკავებულ ექიმს გაათავისუფლებენ. რეალურად პროცედურული თვალსაზრისით, დღეს ამის შანსი არსებობს, წინა პროცესზე კი, პროცედურულად ეს შეუძლებელი იყო. ჩვენ ყოველწუთიერი კონტაქტი გვაქვს იმ ვლადიკავკაზელ ადვოკატებთან, რომლებიც გაფრინდაშვილის ინტერესებს იცავენ. დაველოდოთ მოვლენების განვითარებას“, - განაცხადა „ინტერპრესნიუსთან“ საუბრისას დავით ასათიანმა.
საოკუპაციო ძალების წარმომადგენლებმა ცნობილი ექიმი-ტრავმატოლოგი ვაჟა გაფრინდაშვილი 9 ნოემბერს, ახალგორის რაიონში დააკავეს. ექიმის ოჯახი ვარაუდობს, რომ ვაჟა გაფრინდაშვილს ახალგორში დაშავებული ადამიანისთვის დახმარების გაწევა სურდა.
დე ფაქტო ხელისუფლებამ ვაჟა გაფრინდაშვილს ე.წ. სახელმწიფო საზღვრის განზრახ დარღვევის ბრალდება წაუყენა რუსეთის სისხლის სამართლის კოდექსის 322-ე მუხლით, რომელიც ითვალისწინებს 200 000 რუბლით დაჯარიმებას, ორ წლამდე იძულებით სამუშაოებს, ან ორ წლამდე თავისუფლების აღკვეთას. 15 ნოემბერს, ე.წ. ლენინგორის სასამართლომ ვაჟა გაფრინდაშვილს ორთვიანი წინასწარი პატიმრობა შეუფარდა.