ასპინძაში ავტოსაგზაო შემთხვევის შედეგად დაშავებული ორი ახალგაზრდის ჯანმრთელობის მდგომარეობა უკიდურესად მძიმეა. ამის შესახებ „ინტერპრესნიუსს“ იაშვილის კლინიკის პრესსამსახურში განუცხადეს. მათივე ინფორმაციით, პაციენტებს თავის ტვინის დაზიანებები აღენიშნებათ.

გავრცელებული ინფორმაციით, ახალგაზრდები მოპედით გადაადგილდებოდნენ და მათ მანქანა დაეჯახა. არსებული ინფორმაციის თანახმად, ახალგაზრდები 17 და 18 წლის არიან.

შინაგან საქმეთა სამინისტროს ინფორმაციით, აღნიშნულ ფაქტზე გამოძიება 276-ე მუხლის მე-2 ნაწილით მიმდინარეობს, რაც სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევას გულისხმობს იმ ადამიანის მიერ, ვინც ამ სატრანსპორტო საშუალებას მართავს და რამაც ჯანმრთელობის ნაკლებად მძიმე დაზიანება გამოიწვია.