ოკუპირებული აფხაზეთის დე-ფაქტო პარლამენტის „დეპუტატი“, იულია გუნია აცხადებს, რომ „პარლამენტის დეპუტატები“ იკრიბებიან, რათა „პრეზიდენტის ადმინისტრაციასთან“ მიმდინარე მოვლენები განიხილონ.
მისივე თქმით, ე.წ. პარლამენტს მიმდინარე მოვლენებთან დაკავშირებით სესია ჯერ არ დაუნიშნავს.
შეგახსენებთ, ცოტა ხნის წინ სოხუმში მომიტინგეები დე ფაქტო პრეზიდენტის ადმინისტრაციის შენობაში შეიჭრნენ. მათ ფანჯრის მინები ჩაამსხვრიეს და შენობის შიგნით შეღწევა მოახერხეს.
აფხაზური მედიის ცნობით, მომიტინგეები ე.წ. საპრეზიდენტო არჩევნების შედეგების გაბათილებას ითხოვენ.
აფხაზეთში ე.წ. საპრეზიდენტო არჩევნების მეორე ტური გასული წლის 8 სექტემბერს გაიმართა, სადაც დე ფაქტო საარჩევნო კომისიის მონაცემებით, ამჟამინდელმა დე ფაქტო პრეზიდენტმა, რაულ ხაჯიმბამ 47.39%-ით გაიმარჯვა, მოსახლეობის 46,17%-მა კი ხმა ალხას კვიცინიას მისცა. „ამცახარა“ „არჩევნების“ შედეგებს არ აღიარებს და მის გაბათილებას ითხოვს.