აფხაზეთის ე.წ „ცენტრალური საარჩევნო კომისიის“ წევრი - მიუხედავად იმისა, რომ განმეორებითი „საპრეზიდენტო“ არჩევნები დაინიშნა, რაულ ხაჯიმბას შანსი აქვს, მიაღწიოს განმეორებითი არჩევნების, ან მისი შედეგების გაუქმებას
მიუხედავად იმისა, რომ ოკუპირებული აფხაზეთის „ცენტრალურმა საარჩევნო კომისიამ“ დანიშნა განმეორებითი „საპრეზიდენტო“ არჩევნები, მოქმედ დე ფაქტო პრეზიდენტ რაულ ხაჯიმბას აქვს შანსი დაადასტუროს საკუთარი ლეგიტიმურობა და მიაღწიოს განმეორებითი არჩევნების, ან მისი შედეგების გაუქმებას. „რია ნოვოსტის“ ინფორმაციით, ამის შესახებ კომისიის წევრმა გივი გაბნიამ განაცხადა.
„კანონით, რაულ ხაჯიმბას აქვს უფლება ცხრა თვის განმავლობაში გაასაჩივროს სასამართლოს საკასაციო ინსტანციის გადაწყვეტილება უზენაესი სასამართლოს უმაღლეს პრეზიდიუმში. პრეზიდიუმმა ორი თვის განმავლობაში უნდა გამოიტანოს გადაწყვეტილება. მთლიანობაში, საქმის განხილვას, შესაძლოა, 11 თვე დასჭირდეს“, - განაცხადა გაბნიამ.
ამასთან, მისი თქმით, თუ „უზენაესი სასამართლო“ დაადგენს, რომ 2019 წლის „საპრეზიდენტო არჩევნები“ კანონიერად გაიმართა, ახალი არჩევნები ავტომატურად უქმდება.
