აფხაზეთის დე ფაქტო პარლამენტი რაულ ხაჯიმბას გადადგომის შესახებ განცხადებას ორშაბათს ფორმალურად განიხილავს. მანამდე კი, შეასრულებს თუ არა „პრეზიდენტის“ მოვალეობას ე.წ. პრემიერ-მინისტრი, უცნობია. ოკუპირებული აფხაზეთის დე ფაქტო პრეზიდენტის რეზიდენციის შენობა უკვე დატოვეს ოპოზიციამ და მათმა მომხრეებმა და სამართალდამცველებმა. ამის შესახებ რუსული მედია იუწყება. ამის მიზეზი რაულ ხაჯიმბას მიერ, გადადგომის შესახებ ხელმოწერილი განცხადება გახდა, რომელიც უკვე შევიდა ძალაში.

ამავდროულად, ცნობილი გახდა, რომ რუსეთის უშიშროების საბჭოს მდივნის მოადგილის რაშიდ ნურგალიევის ვიზიტის შემდეგ, სოხუმში ჩავიდა რუსეთის პრეზიდენტის ვლადიმერ პუტინის თანაშემწე ვლადისლავ სურკოვი. ამის შესახებ ჟურნალისტებს დე ფაქტო ვიცე-პრემიერმა ასლან ბარციცმა აცნობა.