ხაშურის მუნიციპალიტეტში, გამყოფ ხაზთან მდებარე სოფლების - ჩორჩანას და წაღვლის მიმდებარედ, დე ფაქტო რეჟიმის წარმომადგენლებმა საფორთიფიკაციო ნაგებობების ინსტალაცია დაასრულეს. ხაშურის მუნიციპალიტეტის მერის წარმომადგენლის, ვაჟა ლომიძის განცხადებით, ამ წუთებში დამატებითი საინსტალაციო პროცესი არ შეინიშნება.
„ამ დროისთვის ახალი არაფერი ხდება. როგორც ვიცით, დე ფაქტო რეჟიმის წარმომადგენლებმა დაასრულეს იმ უკანონო ე.წ. სასაზღვრო ღობეების მონტაჟი, რაც ჩორჩანასთან მიმდინარეობდა. მოგეხსენებათ, არსებულ ტყის მასივში გაჭრეს გზა და ე.წ. სასაზღვრო ნაგებობები დაამონტაჟეს, თუმცა, ახლა არანაირი აქტიური გადაადგილება და დამატებითი საინსტალაციო პროცესი არ შეინიშნება. ცალსახაა, რომ რასაც ამ ტერიტორიაზე საოკუპაციო ძალების წარმომადგენლები აკეთებენ, ეს აქტივობები უკანონოა“, - განაცხადა ,,ინტერპრესნიუსთან“ საუბრისას ხაშურის მუნიციპალიტეტის მერის წარმომადგენელმა ვაჟა ლომიძემ.